A

nna Kolbrún Árnadóttir, þingmaður Miðflokksins, kallaði sig þroskaþjálfa á Alþingisvefnum án þess að hafa hlotið menntun sem þroskaþjálfi né fengið starfsleyfi frá landlækni. Þetta kemur  fram í yfirlýsingu frá Þroskaþjálfafélagi Íslands sem hefur tilkynnt brot Önnu til landlæknisembættisins.

Anna Kolbrún er einn þeirra þingmanna sem hittust á Klaustri bar þann 20. nóvember síðastliðinn og létu gamminn geysa. Stundin, DV og Kvennablaðið hafa fjallað ítarlega um samskiptin sem náðust á hljóðupptöku.

„Alþingismaðurinn Anna Kolbrún Árnadóttir hefur kallað sig þroskaþjálfa í æviágripi sínu á vef Alþingis. Þetta er ekki rétt. ÞÍ hefur staðfestingu frá Landlæknisembættinu um að þingmaðurinn hafi hvorki hlotið menntun sem þroskaþjálfi né fengið starfsleyfi frá embættinu,“ segir í yfirlýsingu Þroskaþjálfafélags Íslands sem send var fjölmiðlum í kvöld. Fram kemur að æviágripi þingmannsins á vef Alþingis hafi nú verið breytt og  starfsheitið þroskaþjálfi sé ekki lengur nefnt þar.

Þroskaþjálfafélagið áréttar að starfsheitið þroskaþjálfi er lögverndað. Samkvæmt íslenskum lögum mega þeir einir nota þetta starfsheiti sem hlotið hafa til þess menntun, þ.e. þroskaþjálfanám sem er fjögurra ára háskólanám, og fengið starfsleyfi frá Landlæknisembættinu. 

„Þroskaþjálfafélagið harmar að starfsheitið þroskaþjálfi hafi verið misnotað með þessum hætti enda þótt starfsheitið sé ekki lengur að finna í æviágripi þingmannsins. Félagið hefur þegar tilkynnt brotið til Landlæknisembættisins sem er eftirlitsaðili samkvæmt lögum um heilbrigðistarfsmenn. Í lögunum kemur fram að þeim sem ekki hefur gilt leyfi landlæknis er óheimilt að nota löggilt starfsheiti eða starfa sem heilbrigðisstarfsmaður. Brot gegn ákvæðum laga um heilbrigðisstarfsmenn og reglna sem settar eru á grundvelli þeirra varða sektum eða fangelsi allt að þremur árum.