Metfjöldi kæra vegna byrlunar ólyfjanar

Það sem af er ári hefur 71 mál verið bókað hjá lög­reglu vegna til­vika þar sem ein­stak­lingur telur sér hafa verið byrluð ólyfjan. 78 til­vik voru í fyrra og er það met­fjöldi. Ráðherra telur ákvæði í lögum full­nægj­andi.

Þetta kemur fram í svari Sigríðar Andersen dóms­mála­ráð­herra við fyr­ir­spurn Helga Hrafns Gunn­ars­sonar, þing­manns Pírata. Spyr hann um til­vik þar sem ein­stak­lingur hefur til­kynnt um brot þar sem honum hefur verið byrlað lyf sem dregur úr með­vit­und hans, sjálf­stjórn eða getu til að taka sjálf­stæðar ákvarð­anir. Í svar­inu kemur fram að ekki sé um stað­festa töl­fræði að ræða þar sem byrlun ólyfjan er ekki skráð í mála­skrár­kerfi lög­reglu sem sér­stakt frum­brot.

„Hafa ber ríkan fyr­ir­vara á þessum tölum,“ segir í svari ráð­herra. „Í fyrsta lagi er alls ekki alltaf um brot að ræða, heldur er leitað til lög­reglu vegna gruns um byrlun án þess að annað brot hafi átt sér stað. Þessi til­vik eru því ekki stað­fest og í raun ekki hægt, með ein­földum hætti, að nálg­ast upp­lýs­ingar úr kerfum lög­reglu um fjölda til­vika þar sem sýni var tekið til að rann­saka mögu­lega byrlun og hver nið­ur­staða þeirrar grein­ingar var. Þá er ekki ljóst hvað veldur fjölgun til­vika á tíma­bil­inu en lík­lega er um að ræða vit­und­ar­vakn­ingu frekar en raun­fjölgun til­vika.“

Í svar­inu kemur fram að sam­kvæmt upp­lýs­ingum frá emb­ætti rík­is­lög­reglu­stjóra liggi ekki fyrir verk­lags­reglur um með­ferð og skrán­ingu þess­ara mála. Embætti lög­reglu­stjór­ans á höf­uð­borg­ar­svæð­inu hefur gert drög að slíku verk­lagi, þar sem áhersla er lögð á að bæta skrán­ingu þess­ara til­vika, en það hefur ekki verið inn­leitt hjá emb­ætt­inu.

„Ráðherra treystir lög­reglu­yf­ir­völdum til að halda utan um skrán­ingar brota og bregð­ast við til­kynn­ingum í sam­ræmi við lög og reglur,“ segir í svar­inu. „Það er mat ráð­herra að ákvæði almennra hegn­ing­ar­laga séu full­nægj­andi að því er snertir þá hátt­semi að byrla ein­hverjum ólyfjan,“ segir í svar­inu.