Þingmenn fá að sjá gögn um athugun ráðuneytisins í „leyniherberginu“

Þingmenn vel­ferð­ar­nefndar fá að skoða gögn um nið­ur­stöður vel­ferð­ar­ráðu­neyt­is­ins í málum er varða umkvart­anir barna­vernd­ar­nefnda vegna sam­skipta við Barna­vernd­ar­stofu í skjala­geymslu á nefnda­sviði Alþingis. Þeim er óheim­ilt að afrita gögnin með neinum hætti og eru bundnir ströngum trún­aði. Samkvæmt heim­ildum Stund­ar­innar var nefnd­inni til­kynnt um þetta á þriðju­dag en um er að ræða sömu gögn og Stundin hefur óskað eftir vegna ítar­legrar umfjöll­unar sem birt­ist í blað­inu sem kemur út á morgun. 

Þann 16. mars síð­ast­lið­inn synj­aði vel­ferð­ar­ráðu­neytið upp­lýs­inga­beiðni Stund­ar­innar er laut að nið­ur­stöðum ráðu­neyt­is­ins í málum barna­vernd­ar­nefnda er kvartað höfðu undan afskiptum Braga Guð­brands­sonar hjá Barna­vernd­ar­stofu af ein­stökum málum. 

Stundin kærði synjun ráðu­neyt­is­ins til úrskurð­ar­nefndar um upp­lýs­inga­mál þar sem málið er nú til með­ferðar. Í umsögn ráðu­neyt­is­ins til úrskurð­ar­nefndar vegna kærunnar er meðal ann­ars vísað til 1. mgr. 7. gr. upp­lýs­inga­laga um að réttur almenn­ings til aðgangs að gögnum um mál­efni starfs­manna hins opin­bera taki ekki til „gagna í málum sem varða umsóknir um starf, fram­gang í starfi eða starfs­sam­bandið að öðru leyti“. Fram kemur að það sé í ljósi þessa ákvæðis sem ráðu­neytið telji sér ekki skylt að afhenda gögn um nið­ur­stöður ráðu­neyt­is­ins með per­sónu­grein­an­legum upp­lýs­ingum afmáðum. Af þessu má skilja að til­gang­ur­inn sé sá að vernda frið­helgi Braga Guð­brands­sonar sem opin­bers starfs­manns, en sem kunn­ugt er hefur rík­is­stjórn Íslands til­nefnt hann sem fram­bjóð­anda Íslands til barna­rétt­ar­nefndar Sam­ein­uðu þjóð­anna.

Í umræðum um umkvart­anir barna­vernd­ar­nefnd­anna hefur Ásmundur Einar Daðason félags­mála­ráð­herra full­yrt að for­stjóri Barna­vernd­ar­stofu hafi ekki gerst sekur um brot í starfi. Ráðu­neytið neitar hins vegar að afhenda óper­sónu­grein­an­leg gögn um hvernig kom­ist var að þeirri nið­ur­stöðu; hvað var hæft og hvað ekki í athuga­semdum þeirra þriggja barna­vernd­ar­nefnda sem báru for­stjóra Barna­vernd­ar­stofu þungum sökum. 

Hingað til hefur ráðu­neytið ekki sýnt Alþingi gögnin en nú hefur þing­mönnum verið gert kleift að skoða upp­lýs­ing­arnar í því sem stundum hefur verið kallað „leyni­her­bergið“ á Alþingi í opin­berri umræðu og í fjöl­miðlum. Óskaði vel­ferð­ar­nefnd gögn­unum í lok mars en sam­kvæmt þing­skap­ar­lögum ber stjórn­valdi að verða við upp­lýs­inga­beiðni nefndar innan sjö daga frá mót­töku beiðn­innar. Gögnin bár­ust fyrst nú í vik­unni.