Lindarhvoll braut lög þegar upplýsingum um sölu ríkiseignar var leynt

Lind­ar­hvoll, einka­hluta­fé­lagið sem var sett á lagg­irnar til að halda utan um sölu svo­kall­aðra stöð­ug­leika­eigna rík­is­ins, braut upp­lýs­inga­lög þegar fyr­ir­tæk­inu Frigus II ehf. var synjað um aðgang að upp­lýs­ingum um sölu á eign­ar­hluta og tengdum kröfum í Klakka ehf. sem áður hét Exista. Þá var Lind­ar­hvoli ekki stætt á því að heita þátt­tak­endum í opin­beru sölu­ferli trún­aði um þátt­töku þeirra, enda er Lind­ar­hvoll ehf. bundið af upp­lýs­inga­lögum. Þetta kemur fram í úrskurði sem úrskurð­ar­nefnd um upp­lýs­inga­mál kvað upp fyrr í þessum mán­uði, en nið­ur­staða nefnd­ar­innar er sú að Lind­ar­hvoli ehf. beri að veita Frigusi umbeðin gögn. 

Málið varð­aði tæp­lega 18 pró­senta hlut rík­is­ins í Klakka sem boð­inn var til sölu haustið 2016, en tvö af þremur félögum sem buðu í hlut­inn tengd­ust stjórn­endum Klakka. BLM fjár­fest­ingar ehf. buðu best, en félagið er í eigu vog­un­ar­sjóðs­ins Burlington Loan Mana­gement sem var stærsti kröfu­hafi bank­anna á árunum eftir hrun. Sigurður Val­týs­son, for­svars­maður Frigusar II, gagn­rýndi harð­lega hvernig staðið var að söl­unni á Klakka og full­yrti að þar hefði Lind­ar­hvoll selt rík­is­eignir til sér­val­inna aðila án þess að gæta að lögum og reglum. Nú liggur fyrir að Lind­ar­hvoll gekk lengra í upp­lýs­inga­leynd en lög heim­ila þegar Frigusi var synjað um upp­lýs­ingar um sölu­ferlið. 

Mynd: Morg­un­blaðið/Eggert

Eins og Stundin hefur áður fjallað um er félagið Lind­ar­hvoll einka­að­ili og óbundið af stjórn­sýslu­lögum í starf­semi sinni. Umboðs­maður Alþingis benti sér­stak­lega á þetta þegar frum­varpið um stofnun Lind­ar­hvols var til umfjöll­unar í efna­hags- og við­skipta­nefnd Alþingis árið 2016, en fram kom í árs­skýrslu umboðs­manns fyrir 2015 að oft gætti tregðu hjá ríki og sveit­ar­fé­lögum til að fylgja reglum stjórn­sýslu­rétt­ar­ins við ráð­stöfun opin­berra eigna. Í til­viki stöð­ug­leika­eign­anna var umsýslan falin einka­hluta­fé­lagi sem svo útvi­staði megn­inu af starf­semi sinni til lög­manns­stof­unnar Íslaga í eigu Steinars Þórs Guð­geirs­sonar. Stofan fékk 38,8 millj­ónir króna frá Lind­ar­hvoli ehf. árið 2016 en árs­reikn­ingur fyrir 2017 hefur ekki verið birtur.

Að því er fram kemur á vef Lind­ar­hvols hefur félagið nú lokið öllum þeim verk­efnum sem því voru falin með samn­ingi við fjár­mála­ráðu­neytið frá apríl 2016 um úrvinnslu og umsýslu stöð­ug­leika­eigna. Samn­ing­ur­inn hefur fallið niður og félag­inu verður slitið á næst­unni.