P

recious Felix sem er nýorðinn tvítugur var handtekinn á lögreglustöðinni við Hlemm í gær þegar hann kom þangað til að skrá sig inn; láta vita af sér. Lögregla hafði sagt honum fyrir hálfum mánuði að hann ætti að gera það þrisvar í viku. Þegar hann kom á lögreglustöðina í gær var hann handtekinn og honum tilkynnt að hann yrði sendur úr landi um kvöldið. Hann og nígerísku flóttakonurnar þrjár, þær Blessing, Esther og Mary, eru samkvæmt upplýsingum Heimildarinnar komin til Lagos í Nígeríu. Vélin sem þau voru í lentu þar í hádeginu í dag að íslenskum tíma.   

Precious sem er fæddur og uppalin í Nígeríu hafði sótt um hæli á Íslandi en var synjað um það í byrjun árs. Í febrúar giftist hann Söru Sigurbjörgu Guðmundsdóttur sem er tuttugu og tveggja ára en þau höfðu þá verið kærustupar í tæp tvö ár.  Heimildin hefur fengið að sjá hjúskaparvottorðið og náði tali af Söru þar sem hún var stödd á skrifstofu Útlendingastofnunar í dag. „Ég er að reyna að fá einhver svör hér,“ sagði Sara.

Var í ræktinni þegar eiginmaðurinn var handtekinn

Hún segir að þau hafi farið með hjúskaparvottorðið til Útlendingastofnunar í febrúar en að á fundinum í dag hafi starfsmaður stofnunarinnar sagt að í gær hafi verið framfylgt ákvörðun um að synja eiginmanni hennar um hæli, ákvörðun sem hafi verið tekin áður en þau giftu sig. Sara segir að þau hafi, þegar hann var handtekinn, verið að bíða eftir svörum frá stofnuninni hvað varðaði hjúskaparvottorðið. Hún hafi fengið þær upplýsingar áðan að svör við því myndu berast í sumar. 

En Precious er farinn og Sara nær ekki í hann. „Ég var í ræktinni í gær í hádeginu og þá hringdi hann í mig í gegnum Facetime og náði bara að segja að hann hefði verið handtekinn og yrði sendur til Nígeríu. Hann bað mig að hafa samband við lögfræðing. Sagði að það væri verið að fara að taka af honum símann. Svo var síminn tekinn af honum og ég fékk ekki að segja bless við hann. Löggan vildi ekkert segja mér í gær.“  

Sara segist hafa flýtt sér á lögreglustöðina eftir að hafa heyrt í Precious. Hún vildi freista þess að fá að hitta hann til að geta kvatt hann  almennilega. „Maðurinn sem sat í afgreiðslunni á lögreglustöðinni sagði bara nei.“  

„Held ég sé í áfalli“ 

Sara segist ekki skilja af hverju þetta gerðist allt svona hratt. „Ég held ég sé í áfalli. Ég á erfitt með að hugsa skýrt,“ segir hún. 

Hún segist strax hafa hringt í lögmannsstofuna Norðdahl, Narfi og Silva og beðið þau um að aðstoða manninn sinn. Samkvæmt upplýsingum þaðan hóf starfsfólk þar strax að reyna að fá leyfi til að Sara gæti kvatt eiginmann sinn. Það hafi verið mikið gengið á eftir lögreglu. Án árangurs.   

Sara og Precious bjuggu saman í Hafnarfirði. Þau voru búin að vera kærustupar í tæp tvö ár  þegar þau giftu sig í febrúar síðastliðnum. „Við giftum okkur af því að við elskum hvort annað. Kannski hefðum við beðið lengur með að gifta okkur af því að við erum enn svo ung en við vildum vera saman og ákváðum að gera það strax svo hann fengi að vera hjá mér.“   

Sara segir að Precious hafi komið til Íslands frá Úkraínu í mars árið 2022.  

„Hann var að spila fótbolta þar og var hræddur af því að það var stríð. Þannig að hann flúði þaðan til Íslands.“  

Precious á æfingu í ÚkraínuHann æfði um tíma með liðinu Viktoriya Sumy sem er í annarri deild.

Precious var ekki með úkraínskt ríkisfang og því ekki með sömu stöðu og flest þau sem flúðu þaðan hingað til lands.  

Átti að mæta í vinnu í morgun

Precious var lagerstarfsmaður hjá Jysk í Reykjavík. Í ráðningasamningi kemur fram að hann hafi byrjað að vinna þar í október í fyrra og að ráðningin sé ótímabundin. Sara segir að hann hafi verið ánægður í vinnunni og liðið vel þar. „Hann átti að mæta í vinnuna í morgun. Þetta er allt svo skrýtið.“  

Hún segist eiga erfitt með að skilja allt sem kom fram á fundinum með útlendingastofnun í dag. „Þetta er ótrúlega flókið. Þau sögðu að hann hefði fengið neitun áður en við giftum okkur og þess vegna væri búið að senda hann úr landi. Við fengum enga viðvörun. Hann var bara handtekinn. Útlendingastofnun veit samt að við erum gift en af því að gögnin um það komu inn eftir að hann fékk synjun segja þau að það hafi ekki verið hægt að breyta því. Það mál verði skoðað og við fáum svör í sumar. En á meðan er hann í Nígeríu. Ég skil þetta ekki.“ 

Sara bíður nú eftir að heyra í Precious sem er kominn til Lagos í Nígeríu. ,,Ég veit samt ekkert hvert var farið með hann þar. Ég veit ekki hvort hann er í varðhaldi þar eða, … Ég bara veit ekkert”.