„Nei, í sjálfu sér ekki,“ segir Þórunn Svein­bjarn­ar­dóttir, þing­maður Sam­fylk­ingar og for­maður stjórn­skip­unar- og eft­ir­lits­nefndar, og and­varpar, aðspurð hvort eitt­hvað nýtt hafi komið fram á opnum fundi nefnd­ar­innar í vik­unni þar sem óskað var eftir nán­ari skýr­ingum frá fyrr­ver­andi fjár­mála­ráð­herra á ráð­gjöf sem hann fékk við sölu á Íslands­banka.

Bjarni Bene­dikts­son, utan­rík­is­ráð­herra og fyrr­ver­andi fjár­mála- og efna­hags­ráð­herra, sagði á fund­inum að hann hafi gert ráð fyrir blessun þings­ins á að ekki þyrfti að gæta að hæfi hans gagn­vart hverjum og einum kaup­anda á Íslands­banka í mars 2022. Þinginu hefði átt að vera aug­ljóst að ekki væri hægt að fylgja hæf­is­reglum í sölu­með­ferð­inni sem valin var. Þetta hafi verið vegna þess að sölu­með­ferðin byði ekki upp á það sökum þess hraða sem þurfti að vera á henni. Banka­sýsla rík­is­ins hafi enn fremur verið sú sem lagði til þessa sölu­með­ferð, ekki Bjarni, þótt hann hafi sam­þykkt hana.

RáðherraBjarni Bene­dikts­son sagði af sér sem fjár­mála- og efna­hags­ráð­hhera 10. októ­ber 2023 og tók við sem utan­rík­is­ráð­herra fjórum dögum síðar.

Mynd: Heim­ildin / Davíð Þór

Ákvörðun um sölu og fyrirkomulag á ábyrgð ráðherra

Þórunn segir að nefnd­ar­menn hafi reynt að fá frek­ari skýr­ingar frá Bjarna um hvernig hann geti varpað ábyrgð­inni um að gæta hæfis á Alþingi. „En það liggur svo sem fyrir hvað hann sagði á fund­inum. Mín upp­lifun var sú að ráð­herra var enn og aftur að beina fingrinum frá sjálfum sér og á þingið á meðan það er alveg ljóst að ákvörð­unin um söl­una og fyr­ir­komu­lag hennar var og er á ábyrgð ráð­herr­ans,“ segir Þórunn. Óskað var eftir að Bjarni kæmi fyrir nefnd­ina eftir að hann sagði af sér ráð­herra­emb­ætti í októ­ber í kjöl­far álits umboðs­manns Alþingis sem komst að þeirri nið­ur­stöðu að Bjarni hafi verið van­hæfur til að taka ákvörðun um sölu á rík­is­banka til félags í eigu föður síns. 

Þór­hildur Sunna Ævars­dóttir, þing­maður Pírata, átti frum­kvæði að fund­inum og sak­aði hún Bjarna um útúr­snún­inga og stæla á fund­inum. „Mér heyr­ist að hér sé í upp­sigl­ingu eins konar póli­tískur fundur sem á að nýt­ast til þess að velta sér upp úr löngu liðnum hlutum sem ég hef nú þegar axlað ábyrgð á,“ sagði Bjarni. Þór­hildur Sunna benti honum þá á að þetta væri póli­tískur fundur í póli­tískri nefnd. „Er þetta póli­tísk nefnd?“ spurði Bjarni. „Já, þetta er þing­nefnd,“ svar­aði hún.

„Hann situr í ríkisstjórn Íslands“

Bjarni sagð­ist einnig hafa það sterk­lega á til­finn­ing­unni að fund­ar­menn hafi ekki kynnt sér gögnin. „Það er ekki svara­vert,“ segir Þórunn þegar blaða­maður leitar við­bragða við ummælum fyrr­ver­andi fjár­mála­ráð­herra. Hún segir að það hafi ekki verið að heyra á fram­komu hans á því sem sagt var á fundi nefnd­ar­innar að Bjarni hafi axlað ábyrgð á sölu hlutar rík­is­ins í Íslands­banka. 

Uppgjöri á sölu Íslands­banka er ekki lokið að mati Þórunnar. Ráð­herra­stóla­skipti Bjarna hafi ekki dugað. „Hann situr í rík­is­stjórn Íslands.“ Stjórn­skip­unar- og eft­ir­lits­nefnd hefur hins vegar ekki tekið ákvörðun um næstu skref af hálfu nefnd­ar­innar. „En það er að sjálf­sögðu í höndum þing­manna hvað ger­ist næst,“ segir Þórunn.