Katrín bendir þinginu á að rannsaka aðdraganda og eftirmál Súðarvíkurflóðanna

Katrín Jak­obs­dóttir for­sæt­is­ráð­herra hefur beint kröfu aðstand­enda og eft­ir­lif­enda þeirra sem fór­ust í snjó­flóð­unum í Súðavík árið 1995 til stjórn­skip­unar- og eft­ir­lits­nefndar. Í bréfi sem hún sendi for­manni nefnd­ar­innar á þriðju­dag seg­ist hún ekki hafa heim­ild til að ráð­ast í rann­sókn­ina sjálf en bendir á að það geri þingið. 

Málið hefur verið til skoð­unar í for­sæt­is­ráðu­neyt­inu um nokk­urra vikna skeið en aðstand­endur og eft­ir­lif­endur þrettán þeirra sem fór­ust í snjó­flóð­unum í Súðavík ósk­uðu þess að opin­ber rann­sókn færi fram á aðdrag­anda og eft­ir­málum flóð­anna. Erindi þeirra var sent í kjöl­far ítar­legrar umfjöll­unar Heim­ild­ar­innar um snjó­flóðin. 

Í bréf­inu, sem Katrín sendi Þórunni Svein­bjarn­ar­dóttur, for­manni stjórn­skip­unar- og eft­ir­lits­nefndar, segir hún að rann­sókn­ar­nefnd á vegum þings­ins væri til þess fallin að skapa traust á rann­sókn sem þess­ari, sem varðar með­ferð opin­bers valds og tryggi hlut­leysi. 

„Ekki er að finna í lögum sér­staka heim­ild til handa mér eða öðrum ráð­herrum til að ráð­ast í rann­sókn af þessu tagi,“ segir Katrín í bréf­inu áður en hún bendir á að það geti stjórn­skip­unar- og eft­ir­lits­nefnd gert. „Í sam­ráði við lög­mann aðstand­enda leyfi ég mér að hafa milli­göngu um afhend­ingu þeirra gagna sem fyr­ir­liggj­andi eru í mál­inu sé þess óskað. Þá kann að vera ástæða til að skoða hvort rann­saka eigi önnur ofan­flóð þar sem mann­tjón eða veru­legt eigna­tjón hefur orðið.“

Fram kemur í bréfi Katrínar að málið hafi verið rætt á rík­is­stjórn­ar­fundi 23. maí síð­ast­lið­inn, í kjöl­far fundar sem hún átti með lög­manni aðstand­enda og eft­ir­lif­enda snjó­flóð­anna. Aðstand­end­urnir hafa farið fram á að opin­ber rann­sókn fari fram á ýmsum þáttum sem kunna að hafa áhrif á hvernig fór. Þar á meðal snjó­flóða­hættu­matið sem var í gildi þegar flóðin féllu, skipu­lag byggðar á svæð­inu og rým­ing þegar hættu­á­stand hafði skap­ast. 

Í sam­tali við Heim­ild­ina segir Þórunn að bréf Katrínar hafi borist í dag, sem og gögn máls­ins, sem lög­maður hóps­ins hafði afhent ráðu­neyt­inu. Henni hafi enn sem komið er ekki gef­ist færi á að bera málið upp við nefnd­ina. „Ég er búin að lesa bréfið en ég á auð­vitað eftir að bæði kynna það fyrir nefnd­inni og hugsa næstu skref. Það skiptir mjög miklu máli að við vöndum okkur í við­brögðum við þess­ari óbeinu beiðni. Þetta er lagt í okkar hendur,“ segir Þórunn. 

„Það er ekki bein­línis verið að leggja til eða biðja nefnd­ina um að gera eitt­hvað enda væri það ekki alveg rétt að ráð­herra myndi gera það, en bréfið er komið og gögnin með. Þá er næsta eðli­lega skref að fara yfir það í nefnd­inni og byrja sam­talið og umfjöllun um þetta mál.“

Fram­haldið sé undir nefnd­inni komið, segir Þórunn.

Sjálf hefur hún áður sagt að hún telji rétt að sett yrði á fót nefnd til að rann­saka málið. Þegar Heim­ildin greindi frá fundi for­sæt­is­ráð­herra með lög­manni eft­ir­lif­enda Súða­vík­ur­flóðs­ins og kröfum þeirra um rann­sókn sagði Þórunn: „Per­sónu­lega finnst mér ein­boðið að setja slíka nefnd á fót vegna þess að umfjöllun Heim­ild­ar­innar leiðir ýmis­legt í ljós sem ég er viss um að hafi almennt ekki verið á vit­orði margra. Hins vegar er ég líka á þeirri skoðun að eft­ir­lif­endur og aðstand­endur þeirra sem þarna fór­ust eigi sið­ferði­legan rétt til þess að aðdrag­and­inn og við­brögðin við ham­för­unum séu rann­sökuð til hlítar,“ sagði Þórunn.