„Það er nýtt Ísland að vaxa þarna undir“

Lög um kynja­kvóta í stjórn­um ís­lenskra fyr­ir­tækja tóku gildi fyr­ir tíu ár­um síð­an. Í út­tekt sem Heim­ild­in hef­ur gert ár­lega á þeim ára­tug sem lið­inn er frá þeim tíma­mót­um kem­ur fram að hlut­fall kvenna sem stýra fjár­magni á Ís­landi hef­ur far­ið úr því að vera sjö pró­sent í að vera 14,7 pró­sent. Af 115 störf­um sem út­tekt­in nær til gegna kon­ur 17 en karl­ar 98. Hægt er að lesa um þá úttekt hér til hliðar.

Jenný Ruth Hrafns­dóttir, einn stofn­enda íslenska vís­i­sjóðs­ins Crowberry Capital sem fjár­festir í ungum tækni­drifnum nýsköp­un­ar­fyr­ir­tækjum, segir að það séu fleiri konur í vísi­fjár­fest­ingum á Íslandi í dag en karlar. „Fyrir mér er það fram­tíðin, við erum að fjár­festa í fyr­ir­tækjum fram­tíð­ar­innar. Í fyr­ir­tækjum sem eru ekki skráð núna en verða það eftir ein­hver ár. Kannski ekki skráð á Íslandi, enda flest þeirra að horfa til skrán­ingar ann­ars staðar eða að verða seld til ann­arra og stærri fyr­ir­tækja, en það verða alltaf starfs­stöðvar hér og blóm­leg starf­semi. Þar er miklu jafn­ari leik­völlur og við getum verið bjart­sýnar og minnt á þessa stöðu, þótt það sé pirr­andi að vita af þessum hlut­föllum sem koma fram í úttekt­inni ykkar.“

Hún segir að nýtt kerfi sé að verða til. „Það er oft talað um að það sé mikið af „alpha males“ í fjár­mála­geir­anum og að það sé karllægur bransi. Þar sé mikið keppn­is­skap í fólki og mikið af til dæmis íþrótta­fólki leiti þangað. Ég held að það sé alveg umdeil­an­legt hvort það skapi mesta ávöxtun eða mestan hag­vöxt fyrir sam­fé­lagið. Að það sé alltaf besta leiðin að vera í ein­hverju bræðra­lagi og fara svo í bjór­inn eftir vinnu. Ég held frekar að það sé gott að liggja yfir hlut­unum, vera með góða stra­tegíu og búa til sterk fyr­ir­tæki sem skipta meira máli til langs tíma. Þar hefur inn­sæi, þekk­ing á mark­aði og skiln­ingur á við­skipta­vinum miklu meira að segja.“

Aðspurð hvað sé hægt að gera til að hraða því að fleiri konur kom­ist til áhrifa í íslenskum fjár­mála­heimi, segir Jenný að það snú­ist mikið um fyr­ir­myndir. Aðgerðir skipti meira máli en tal. „Við erum með marga rosa­lega flotta kven­fjár­festa og ég hef líka mikla trú á körlunum sem eru að starfa í vís­i­sjóðum og nýsköp­un­ar­fyr­ir­tækj­unum. Þeir vilja breyta þessu, ég heyri það. Það er nýtt Ísland að vaxa þarna undir en það er ekki alveg búið að brjót­ast upp. Það mun ger­ast. Ég er rosa­lega bjart­sýn á það. En ég er líka óþol­in­móð og þetta má alveg breyt­ast hraðar.“

Jenný minnir á að Ísland er að mörgu leyti fyr­ir­mynd í heim­inum þegar kemur að jafn­rétt­is­málum. Við séum að gera margt rétt, til dæmis þegar kemur að fæð­ing­ar­or­lofi karla. Í öðrum sam­fé­lögum, til dæmis í Þýska­landi og í Banda­ríkj­unum, sé miklu karllægri menn­ing en hér. „Ef þeir sem stýra málum í þessum fyr­ir­tækja­heimi, sem eru ekki með fjöl­breytt stjórn­enda­teymi, fara ekki að átta sig á því að þetta er ekki rétta leiðin, þá munu þeir senni­lega tapa. Þetta er ein­fald­lega ekki góður bis­ness.“