Í íbúð einni á Hringbraut, í verkamannabústöðunum nánar tiltekið, býr áttatíu og tveggja ára gömul kona sem kölluð er Gréta. Íbúðin sem Gréta býr í er ekkert svo ólík öðrum íbúðum í Verkó, eins og bústaðirnir eru gjarnan kallaðir, en flestar ef ekki allar íbúðirnar í Verkó eru alveg eins. Þær eru flestar jafn stórar, eða á bilinu 45 til 75 fermetrar.
Í þessari íbúð, á fyrstu hæð til hægri, býr Gréta og hefur búið með hléum frá því að hún fæddist með og án hinna ýmsu fjölskyldumeðlima. Saga fjölskyldu hennar er eins og skrifuð á veggi íbúðarinnar og situr eftir bæði í húsgögnum, innréttingum og í Grétu sjálfri. Í þessari sérstöku íbúð á fyrstu hæð til hægri hefur Gréta upplifað fæðingu, dauða og allt lífið þar á milli. Ævisaga Grétu er samtvinnuð sögu íbúðarinnar, en lengjan við Hringbraut austan við Hofsvallagötu var byggð árið 1936.
Athugasemdir