Solastalgia

Hvar? Listasafn Íslands
Hvenær? 10. júlí–30. september
Aðgangseyrir: 2.900 kr.

Gestir úr óþekktri framtíð ganga inn í 250 fermetra innsetningu með höfuðbúnað sem heimilar þeim að sjá gagnaukinn veruleika (e. augmented reality) og kanna jörðina eftir endalok mannkyns þar sem dularfullt stafrænt ský, sem knúið er áfram af undarlegri vél, er það eina sem eftir stendur. Á meðan að gestir ganga um plánetuna þar sem mosi, brak, rústir og steingervingar hafa numið land birtast vofur mannfólks allt í kring og tjá hin gleðiríku, djúpstæðu og grimmu augnablik tilverunnar um alla eilífð. Innsetningin er eftir alþjóðlegt teymi listamanna úr ýmsum greinum leidda af þeim Antoine Viviani og Pierre-Alain Giraud. Mælt er með því að panta miða fyrirfram á netinu þar sem aðeins tíu manns geta skoðað hana í einu.

Lokahóf post-dreifingar

Hvar? Iðnó
Hvenær? 11. júlí kl. 17.00
Aðgangseyrir: Ókeypis!

Listræna kollektífið post-dreifing hefur verið með yfirtöku á Klúbbi Listahátíðar í Reykjavík og haldið fjölmarga þrusugóða og líflega tónleika, en þessi viðburður er sá síðasti í seríunni. Fram koma indírokkararnir í Skoffín, pönk-þríeykið Gróa, danska rafsveitin ZAAR, lágstemmda og tilraunakennda tríóið Dymbrá og fleiri.

Dömur og herra daðra af jaðrinum

Hvar? Tjarnarbíó
Hvenær? 11. júlí kl. 21.30
Aðgangseyrir: 2.500 kr.

Búrlesk-hópurinn Dömur og herra hefur haslað sér völl á Íslandi með lostafullum og lífsglöðum fjölbragðasýningum. Þetta er í 20. sinn sem hópurinn blæs til sýningar, með það að markmiði að bæta, hressa og kæta. Grín og fögnuður yfir líkamanum og undrum hans eru ofarlega á baugi í sýningunni.

Bíó Tvíó í beinni

Hvar? Röntgen
Hvenær? 15. júlí kl. 20.00
Aðgangseyrir: Ókeypis!

Í hlaðvarpinu Bíó Tvíó rýna Andrea Björk Andrésdóttir og Steindór Grétar Jónsson í íslenskar kvikmyndir, en þátturinn hefur verið í gangi í tæp fjögur ár. Þáttur #180 fjallar um Stella í framboði frá 2002 sem var nýverið sýnd á RÚV, en áhorfendum býðst að vera viðstaddir og taka þátt er hann er tekinn upp.

Iceland Documentary Festival 2020

Hvar? Bíóhöllinni, Akranesi
Hvenær? 15.–19. júlí
Aðgangseyrir: 0–13.500 kr.

IceDocs er haldin í annað skiptið en á henni verða yfir 20 heimildarmyndir frá öllum heimshornum sýndar. Myndunum verður varpað í Bíóhöllinni, sem er með eldri og fallegri bíóhúsum landsins. Einnig verður til boðs fjölbreytt dagskrá af barnaviðburðum, tónleikum, pöbb kvissum og margt fleira. Frítt er á opna viðburði og í bíó.

Bríet

Hvar? Café Flóra
Hvenær? 17. júlí kl. 20.00 & 22.00
Aðgangseyrir: 4.500 kr.

Þúsaldarkynslóðapoppstjarnan BRíET hefur verið afkastamikil í dægurtónlistarlífi þjóðarinnar síðustu tvö ár og haldið dúndurtónleika á flestum hátíðum og tónleikastöðum landsins. Búast má við slíku á þessum nánu viðburðum sem fara fram tvisvar sama dag á Café Flóru í Grasagarði Reykjavíkur. Bríet kemur fram ásamt hljómsveit.

Special-K

Mynd: Kristín Helga Ríkharðsdóttir

Hvar? Mengi
Hvenær? 17. júlí kl. 21.00
Aðgangseyrir: 2.000 kr.

Með bakgrunn í myndlist og klassískum píanóleik skapar Katrín Helga Andrésdóttir heim með ólíkum miðlum eins og tísku, myndum og textum í sólóverkefninu sínu Special-K. Heim þar sem há- og lágmenning mætast í post-internet fagurfræði, flóknum hljómasamböndum og amatör blokkflautusólóum. Þar kannar hún depurð og einmanaleika af fullri og engri alvöru.

Litla Eistnaflug

Hvar? Spot
Hvenær? 17. & 18. júlí
Aðgangseyrir: 6.900 kr.

Eins og flestar tónlistarhátíðir sumarsins féll Eistnaflug niður, en skipuleggjendur deyja ekki ráðalausir. Þess í stað efna þeir til rokkveislu með mörgum af efnilegustu sveitunum sem hefðu komið fram á hátíðinni. Má þar nefna til dæmis The Vintage Caravan, Une Misère, Misþyrming, Rock Paper Sister, Volcanova, Alchemia og Grafnár.

Ólöf Arnalds og Skúli Sverrisson

Hvar? Norræna húsið
Hvenær? 22. júlí kl. 21.00
Aðgangseyrir: 3.000 kr.

Ólöf Arnalds og Skúli Sverrisson eru sjóaðir flytjendur sem hafa komið víða við. Í fyrra héldu þau vel sótta tónleika í Norræna húsinu og ætla þau að endurtaka leikinn. Ólöf er einstök söngkona, lagasmiður og fjölhæfur hljóðfæraleikari. Skúli er skapandi bassaleikari og hefur samið fjölda óvenjulegra tónverka.

Shapeless Vibrations

Hvar? Midpunkt
Hvenær? Til 26. júlí
Aðgangseyrir: Ókeypis!

Á þessari samsýningu Claire Paugam og Valgerðar Ýrar Magnúsdóttur er til sýnis innsetning þar sem formleysið er kannað. Hið formlausa er síbreytilegt, óskýrt og erfitt að fanga. Allt sem lifir mun óhjákvæmilega rýrna og missa form sitt. Formleysa er inngangur inn í hið óþekkta, hlið á umhverfi okkar sem forðast að fara eftir reglum.