Ursula von der Leyen, forseti framkvæmdastjórnar Evrópusambandins, hefur kynnt enn frekari viðurlög vegna innrásar Rússlands í Úkraínu, í kjölfar fundar framkvæmdastjórnarinnar fyrr í dag þar sem var ákveðið að Evrópusambandið myndi fjármagna og koma til skila hergögnum til Úkraínu.
Tilkynnir von der Leyen um aðgerðirnar á Twitter-aðgangi sínum, þar sem segir Evrópusambandið ætla að bæta enn við þær víðtæku þvingunaraðgerðir sem kynntar voru í gær.
[links]Í fyrsta lagi verði lofthelgi Evrópusambandsins lokað fyrir umferð flugvéla skráðra í Rússlandi, sem muni ekki geta lent eða tekið á loft á landsvæði sambandsins eða flogið yfir lofthelgi þess. Þetta eigi einnig við um einkaflugvélar rússneskra ólígarka.
Í öðru lagi verði lagt algert bann við því sem hún kallar fjölmiðlamaskínu Kreml í Evrópu. Þannig muni ríkisreknu rússnesku fjölmiðlarnir Russia Today og Sputnik, og undirmiðlar þeirra, ekki geta dreift lygum sínum til að réttlæta stríð Vladimírs Pútín Rússlandsforseta.
Í þriðja lagi verði ráðist í aðgerðir gegn hinum árásaraðila stríðsins, stjórn Alexanders Lukashenko Hvíta-Rússlandsforseta, með áherslu á helstu atvinnugreinar landsins.
Þá hælir hún hugrekki Volodymyrs Zelenzkyy, forseta Úkraínu, sem og seiglu úkraínsku þjóðarinnar og segir Evrópusambandið taka opnum örmum á móti fólki á flótta frá Úkraínu vegna átakanna, auk þess sem sambandið muni styðja við þær nágrannaþjóðir Úkraínu sem tekið hafi við flóttafólki.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir