Útgerðarfélag Reykjavíkur hf. (ÚR) hefur með bréfi til atvinnuvega- og nýsköpunarráðuneytisins kært ákvörðun Fiskistofu um 12 vikna sviptingu veiðileyfis Kleifabergs RE 70 frá 2. febrúar sl.
Félagið fer fram á að ráðuneytið felli ákvörðunina úr gildi.
Þetta kemur fram í tilkynningu frá ÚR, en Guðmundur Kristjánsson, forstjóri HB Granda, er stærsti eigandi félagsins.
Í kærunni kemur fram að „svipting veiðileyfis sé alvarleg ákvörðun“ sem valda muni verulegu tjóni og er ekki í neinu samræmi við hin meintu brot. Tjónið er meira en áður hefur hlotist af stjórnvaldssektum og er sérstaklega hátt vegna þess að það fellur á þann árstíma sem skipið aflar að jafnaði þriðjung sinna tekna.
„Rökstuðningur ákærunnar er margþættur. Ákvörðun Fiskistofu byggir á mjög veikum lagagrunni og eru meint brot löngu fyrnd. Rannsókn Fiskistofu og aðferðir eru ámælisverðar og langt í frá fullnægjandi en myndskeið sem ákvörðun byggir á eru sviðsett, sýna ekki brottkast í skilningi laga og einnig eru skýringar og túlkanir Fiskistofu rangar. Þá er andmælaréttur brotinn og beiting Fiskistofu á sönnunarreglu er ólögmæt. Að síðustu er beiting hámarksrefsingar brot á meðalhófi og óboðlegt opinberu stjórnvaldi,“ segir í tilkynningunni.
ÚR mun gera allt í sínu valdi til að hnekkja ákvörðun Fiskistofu en takist það ekki áskilur sér félagið rétt til að sækja bætur vegna alls þess tjóns sem félagið og/eða áhöfn Kleifabergs verður fyrir vegna ákvörðunarinnar.
Runólfur Viðar Guðmundsson, framkvæmdastjóri ÚR, segir í tilkynningu að ÚR bindi vonir við við að ráðuneytið grípi til aðgerða. „Við erum vongóð um að ráðuneytið felli ákvörðunina fljótt úr gildi eða fresti réttaráhrifum hennar á meðan endanleg niðurstaða liggur ekki fyrir. Ákvörðun Fiskistofu er lagalega röng og málsatvik hafa ekki verið rannsökuð. Svipting veiðileyfis í 12 vikur á þessum árstíma leiðir til gríðarlegs fjárhagslegs tjóns. Íslenska ríkið getur orðið skaðabótaskylt gagnvart 52 áhafnarmeðlimum Kleifabergs og væntar kröfur þeirra verða á bilinu 3-400 milljónir króna sem ríkissjóður gæti þurft að greiða, ef ráðuneytið frestar ekki þessari röngu veiðileyfasviptingu.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir