Davíð við fréttamann: „Þú ert í forsetaslag við mig“

Davíð Oddsson, fyrr­ver­andi seðla­banka­stjóri, borg­ar­stjóri og for­sæt­is­ráð­herra, sagði að fólk sæi í hvaða flokki Andri Snær Magnason og Guðni Th. Jóhann­es­son væru í kapp­ræðum á Stöð 2 í kvöld. Báðir neit­uðu þeir að hafa tekið þátt í starfi stjórn­mála­flokka, en Davíð vildi kenna þá við flokka. Sjálfur var hann for­maður Sjálf­stæð­is­flokk­ins um ára­bil.

Andri Snær Magnason, Davíð Oddsson, Guðni Th. Jóhann­es­son og Halla Tóm­as­dóttir tóku þátt í kapp­ræðum fyrir for­seta­kosn­ingar á Stöð 2 í kvöld. Öðrum fram­bjóð­endum var ekki boðið að taka þátt.

Í umræðu um stjórn­mála­þát­töku kváð­ust hvorki Halla Tóm­as­dóttir, Guðni Th, né Andri Snær hafa tekið þátt í flokkapóli­tík. 

„Fólk sér hvar þú ert í flokki,“ svar­aði Davíð, eftir svör Andra Snæs. Þá nefndi hann að Guðni Th. hefði stuðn­ing meðal Sam­fylk­ing­ar­innar.

Sakar spyril um að vera í slag

Davíð sak­aði Þorbjörn Þórð­ar­son, frétta­mann og spyril í þætt­inum, um að vera í for­setaslag við hann.

Ummælin féllu þegar Þorbjörn spurði Davíð nánar út í orð hans um að ef öll mál færu í þjóð­ar­at­kvæða­greiðslu myndi fólk „hætta að kjósa til Alþingis.“ 

„Þú ert svona í for­setaslag við mig, ein­hvern. Það er allt í lagi mín vegna,“ sagði Davíð.

Davíð taldi að var­lega þyrfti að fara í að heim­ila að fólk gæti knúið fram þjóð­ar­at­kvæða­greiðslur með ákveðnu hlut­falli und­ir­skrifta almenn­ings. „Áhuginn og nauð­syn þess að kjósa til þings minnkar,“ útskýrði hann.

Efaðist um skoðanakönnun

Í skoð­ana­könnun 365 sem kynnt var í þætt­inum kom fram að Guðni Th. væri með 65% fylgi, Davíð 20% fylgi, Andri Snær 8%, Halla 2,5% og aðrir tölu­vert minna. Davíð efað­ist um nið­ur­stöður könn­un­ar­innar, þar sem hún væri ekki í fullu sam­ræmi við aðrar kann­anir. Fylgi Davíðs mæld­ist 18% í könnun MMR sem kynnt var í gær, en í könnun, sem gerð var fyrir stuðn­ings­menn Davíðs, mæld­ist hann með 22%. 

„Ég held að það sé ein­hver skekkja í þessu og bind vonir við það,“ sagði hann og kvaðst treysta á að bæta við sig einu pró­senti á dag fram að kosn­ing­unum eftir mánuð.

Davíð hefur áður efast um nið­ur­stöður skoð­ana­kann­ana. Árið 2009 voru 90% lands­manna and­vígir því að hann gegndi stöðu seðla­banka­stjóra eftir banka­hrunið. Í við­tali við Kast­ljósið hafn­aði hann könn­un­inni og sagði að „þessi skoð­ana­könnun, sem var nefnd þarna líka, sem Baugs­miðl­arnir birtu“ væri ekki þess eðlis að hann tæki mark á henni.

Davíð gagn­rýndi kynn­ingu sama þáttar og sak­aði spyril­inn, Sigmar Guð­munds­son, um ófag­lega umræðu. Hann tók sem dæmi að Sigmar sjálfur gæti verið rúinn trausti.