Þessi færsla er meira en 7 ára gömul.
Blómkálsbaka
Upp á síðkastið hef ég mikið verið að skoða uppskriftir sem eru hollar og næringarríkar en ekki kolvetnisríkar. Það getur verið ögn snúið, þar sem að grjón, pasta eða kartöflur er yfirleitt miðja máltíðanna minna. En nýlega prófaði ég að gera blómkáls 'hrísgrjón' og þau heppnuðust mjög vel. Einnig keypti ég mér grænmetisskera sem gerir ræmur þannig að hægt er að elda 'spagettí' úr t.d. kúrbít.
Nýja uppáhaldið okkar hjóna er blómkálsbaka. Þessi réttur er tilvalin sem pizzu staðgengill fyrir þá sem vilja minnka kolvetni í matarræðinu og þá sem eru með glútenóþol þar sem að í bökunni er einungis blómkál, chiafræ, möndlumjöl og krydd.
Blómkálsbaka
Stór blómkálshaus
3 msk chia fræ
6 msk vatn
1/2 bolli möndlumjöl - einnig hægt að nota kókoshveiti
Krydd að eigin vali. Ég nota:
1 tsk salt
1 tsk hvítlaukskrydd
1 tsk oreganó
1 tsk rósmarín
Ofan á bökuna
Ég reyni að nýta afgangs grænmeti í álegg á bökuna.
Sósa - ég notaði tapenade en það er hægt að nota pizzasósu, tómatpúrru eða pestó.
Grænmeti - ég þurrsteikti þunnar sneiðar af sætri kartöflu, brokkolí og rauða og græna tómata.
Grænar ólívur
Næringarger
Klettasalat
Aðferð
Hitið ofninn í 200 gráður. Byrjað er að skola og hreinsa blómkálið og skera svo 'blómin' af og setja í matvinnsluvél. Vinnið blómkálið þar til það líkist hrísgrjónum.
Ég þarf að setja blómkálið í skömmtun í mína matvinnsluvél. Blómkálsgrjónin þarf svo að setja í ostaklút (e. cheese cloth) og kreista úr allan vökvann. Það er líka hægt að nota nælonsokk eða jafnvel lítinn óhreinatauspoka úr Ikea. Það er magnað hversu mikill vökvi er í blómkálinu og þetta er ágætis líkamsrækt að ná mestum vökvanum burt.
Hér má sjá allan vökvann sem kom úr blómkálinu
Því næst þarf að útbúa chia 'egg'. Þremur matskeiðum og chia er blandað við sex matskeiðum af vatni í litla skál. Blandan látin standa í nokkrar mínútur eða þar til myndast hefur nokkurs konar gel.
Síðan er blómkálsgrjónunum, möndlumjölinu, chia-egginu og kryddunum blandað saman. Mér finnst best að kreista blönduna saman með höndunum til að ganga úr skugga um að allt blandist saman.
Setjið bökunarpappír í form eða á bökunarplötu og fletjið blönduna vandlega út, eins þunnt og hægt er án þess að göt myndist. Bakið þar til bakan er gullinbrún - uþb 20-30 mínútur. Þá er bakan tekin úr ofninum, álegginu bætt við og bakan sett aftur inn í ofn og bökuð í 7-10 mínútur.
Þegar bakan er tilbúin er klettasalatinu bætt við ásamt næringargeri.
Njótið!
Fleiri færslur frá höfundi
Súkkulaði-avókadóterta
Ég er hluti af vinkonuhóp sem kallast Háværurnar. Nafnið er auðskýrt - fimm blaðrandi söngkonur sem eiga það til að tala hvor aðra í kaf. Við höfum verið vinkonur í rúm tíu ár og í dag erum við dreifðar víðs vegar um Evrópu. Þegar við erum allar á Íslandi höldum við lítið ( en hávært) matarboð. Verkaskiptingin er alltaf sú...
Jackfruit-vængir
Nú hlýtur hverjum þeim sem les þetta blogg að vera ljóst að ég elska jackfruit. Allavega er þetta þriðja uppskriftin hér sem byggð er á þessum undraávexti. Í þetta skipti gerði ég jackfruit-vængi eða KFJ (Kentucky Fried Jackfruit). Það er viðeigandi að kalla þessa uppskrift KFJ þar sem að ég prófaði að nota kryddblöndu sem á að vera „nákvæm“ eftirlíking...
Sætkartöflu Wellington
Ég er mjög spennt fyrir jólamatnum. Síðustu tvö ár hef ég gert grænmetis Wellington, sem er dýrindis grænmetisfylling bökuð í smjördeigi. Ég hlakka alltaf til að borða Wellington og þessi réttur er yfirleitt sá sem ég geri til hátíðarbrigða. Wellington passar líka ótrúlega vel með hefðbundnu jólameðlæti. Fyrsta uppskriftin sem ég prófaði var frá Jamie Oliver. Sú uppskrift er með...
Eggaldinsúpa
Ég elska súpur. Þær geta verið svo dásamlega einfaldar og margbreytilegar. Það kann að hljóma undarlega en súpur er uppáhalds maturinn minn. Ég segi súpur af því að það er ekki nein ein súpa sem númer eitt. Ég geri mismunandi súpur fyrir mismunandi tilefni. Sterka og iljandi sætkartöflusúpu þegar kalt er úti, með extra skammti af engiferi þegar ég finn...
Athugasemdir