Meðfylgjandi myndir tók ég í gær í Seltúni þegar ég kom gangandi af Sveifluhálsinum eftir Ketilstíg. Sveifluhálsinn er í miklu uppáhaldi hjá mér með sínar mögnuðu móbergsmyndanir og  hálendislandslag. Alveg stórkostlegt gönguland sem og Krýsuvíkur- og Trölladyngjusvæðið allt, sem er innan Reykjanesfólkvangs. Ekki er óalgengt að þessi sjón mæti manni í Seltúni en hverasvæðið þar dregur að sér sífellt fleiri ferðamenn. Þá fer þeim greinilega fjölgandi sem hafa uppgötvað hversu skemmtilegt gönguland þetta svæði er.  Fyrir nokkrum árum mætti maður aldrei nokkrum manni á göngu uppi á Sveifluhálsi en í dag teldst það mjög óvenjulegt.

Fyrir um þremur árum stóð stjórn Reykjanesfólkvangs fyrir talningu á ferðamönnum sem koma í Seltún og voru þeir að meðaltali um eittþúsund dag hvern. Þarna væri upplagt tækifæri til uppbyggingar í ferðaþjónustu með byggingu Krýsuvíkurstofu. En því miður virðist metnaðurinn í þeim málum hjá sveitarfélögunum vera  á núlli.  Þau eiga sína fulltrúa í stjórn Reykjanesfólkvangs en virðast oft á tíðum ekki ætlast til neins af þeim enda fjármagnið til fólkvangsins skorið við nögl.  Í stjórninni hafa setið einstaklingar með metnað og hugmyndir til að auka veg fólkvangsins en yfirleitt fá þeir dræmar undirtektir eða þeim er skipt út fyrir einhvern annan. Í  svokallaðri friðlýsingu sem Reykjanesfólkvangur á að njóta er í raun kveðið á um að svæðið sé útivistarsvæði þangað til annað kemur í ljós. Býsna margt var tekið út fyrir sviga í friðlýsingunni, m.a. möguleikinn á jarðhitavinnslu. Sveitarfélögin og orkufyrirtækin hafa ávallt horft hýru auga til hennar og af þeim sökum hefur Krýsuvík aldrei fengið þann sess sem svæðið ætti að njóta sem fólkvangur.

Samkvæmt nýlegum fréttum hafa Hafnarfjarðarbær og HS Orka hafið á ný viðræður um hugsanlega orkuvinnslu í Seltúni og þær fréttir valda manni ónotum. Þær hugmyndir sem uppi eru um jarðhitavinnslu í fólkvanginum eru algjörlega glórulausar.  Sumir hafa haldið því fram að í lagi sé að virkja í Krýsuvík því þangað komi hvort eð er svo fáir. Þeir hinir sömu verða að koma með önnur rök því þessi eru algjörlega haldlaus eins og ofangreindar staðreyndir sýna.
Upphaflega stóð til að Krýsuvík yrði meginstoðin í orkuöflun fyrir álver í Helguvík en nú er ljóst að þeir villtu draumar eru úti. Það dregur samt ekki úr viljanum til að virkja – og eyðileggja.  Ekki dregur það heldur úr virkjanafíklunum að Krýsuvík var sett í ruslflokk (orkunýtingarflokk) í  2. áfanga rammaáætlunar.

Í Hafnarfirði er mikil þverpólitísk andstaða gegn virkjunum í Krýsuvík enda þykir mörgum bæjarbúanum afar vænt um þetta magnaða svæði. Svo er að sjá hversu mikið þor fólk hefur til að láta þær skoðanir í ljós þegar á reynir.

Í meðfylgjandi tengli má skoða myndir frá Krýsuvík og nálgast meiri fróðleik um svæðið.