Innanríkisráðuneytið verður að styðja betur við starfsemi Ríkissaksóknara. Frá árinu 2008 hefur það til dæmis ekki óskað eftir fjárlagatillögum frá embættinu sem byggja á raunverulegri fjárþörf þess til að geta sinnt hlutverki sínu með fullnægjandi hætti. Þetta kemur fram í skýrslu Ríkisendurskoðunar um Ríkissaksóknara. Þá segir að embætti Ríkissaksóknara hafi ítrekað vakið athygli ráðuneytisins á því að fjárhagsstaða þess kæmi í veg fyrir að það gæti afgreitt sakamál innan eðlilegs tíma og sinnt lögbundnu eftirlitshlutverki sínu nægilega vel. Oft hefur verið fátt um svör frá ráðuneytinu, eins og segir í skýrslunni. Sigríður J. Friðjónsdóttir, ríkissaksóknari, segir þá staðreynd að stjórnvöld, ráðuneyti og ráðherrar hafa í gegnum tíðina sýnt verkefnum ákæruvaldsins lítinn skilning standa upp úr í skýrslunni að sínu mati. „Þá á ég við að hvorki hefur verið skilningur á mikilvægi né umfangi verkefnanna,“ segir Sigríður í svari við fyrirspurn Stundarinnar. Þá segir hún að í skýrslunni sé lögð áhersla á sjálfstæði ríkissaksóknara og ákæruvaldsins. „En sjálfstæðið fer fyrir lítið ef embættinu er ekki gert kleift að sinna verkefnum sínum sökum fjárskorts.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.












































Athugasemdir