Landsvirkjun, stærsta orkufyrirtæki landsins sem er að öllu leyti í eigu íslenska ríkisins, hagnaðist um 19 milljarða króna á fyrstu sex mánuðum ársins 2022. Rekstrartekjur fyrirtækisins voru 45,5 milljarðar króna og hækka um 29,5 prósent frá sama tímabili árið áður.
Nettó skuldir Landsvirkjunar lækkuðu um 19,8 milljarða króna frá áramótum og til loka júnímánaðar og og handbært fé frá rekstri nam 31,5 milljörðum króna, sem er hækkun upp á 43,6 prósent frá árinu áður.
Aldrei hærra verð til stórnotenda
Í tilkynningu til Kauphallar Íslands kemur fram að endursamningar við stórnotendur hafi verið lykilbreyta í bættri afkomu.
[adspot]Þar er haft eftir Herði Arnarsyni, forstjóra Landsvirkjunar, að eftirspurn eftir raforku hafi verið með allra mesta móti á tímabilinu, en orkuafhending til stórnotenda jókst um fimm prósent og afhending forgangsorku í heildsölu um 23 prósent. „Um leið var meðalverð til stórnotenda án flutnings hærra en nokkru sinni áður á fyrri árshelmingi, eða 42,1 dalur á megavattstund. Þetta má m.a. rekja til endursamninga undanfarinna ára, sem tryggt hafa að flestir viðskiptavinir Landsvirkjunar borga verð sem er sambærilegt við það sem gengur og gerist í þeim löndum sem við berum okkur helst saman við.“
Næstum jafn mikill hagnaður og allt síðasta ár
Til samanburðar má nefna að hagnaður Landsvirkjunar á öllu árinu 2021 var 19,3 milljarðar króna. Af þeim hagnaði greiddi fyrirtækið 15 milljarða króna í arð til ríkissjóðs.
Landsvirkjun vinnur nálægt ¾ af allri raforku Íslands. Álverin sem hér starfa eru langstærstu viðskiptavinir Landsvirkjunar, en orkusamningar þeirra taka mið af heimsmarkaðsverði á áli. Alls fer um 80 prósent af þeirri orku sem er framleidd á Íslandi til stórnotenda.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir