Lögreglunni á höfuðborgarsvæðinu bárust 43 tilkynningar um kynferðisbrot sem áttu sér stað í maí. Fjölgunin er verulega mikil, bæði milli mánaða, og miðað við bæði 6 mánaða meðaltal og 12 mánaða meðaltal.
Í apríl síðastliðnum bárust lögreglunni 9 tilkynningar um kynferðisbrot. Að meðaltali voru 19 kynferðisbrot tilkynnt á mánuði á 6 mánaða meðaltali þar á undan og einnig 19 brot að meðaltali á mánuði á 12 mánaða tímabili þar á undan. Fjölgunin frá meðaltali nemur 128 prósentum. Þá voru 67 kynferðisbrot skráð í maí síðastliðnum, ótengt því hvenær brotin voru framin.
Alls hafa 114 kynferðisbrot verið tilkynnt það sem af er ári, samanborið við 127 á sama tímabili árið 2018. Sé hins vegar horft á meðaltal tilkynninga síðustu þrjú ár á undan, árin 2016 til 2018, hafa lögreglunni á höfuðborgarsvæðinu borist fjögur prósent fleiri tilkynningar um kynferðisbrot það sem af er ári.
Tilkynnt var um kynferðisbrot í öllum fjórum löggæsluhverfum lögreglunnar á höfuðborgarsvæðinu í maí, en það er breyting frá fyrri mánuði þar sem eingöngu voru skráð kynferðisbrot á löggæslusvæði 1, sem nær yfir Miðborg, Vesturbæ, Seltjarnarnes, Háaleiti, Hlíðar og Laugardal. Þar voru skráð brot einnig langflest í maí, eða 31.
Í tilkynningu frá lögreglunni á höfuðborgarsvæðinu kemur fram að þessa miklu fjölgum megi einna helst rekja til aðgerða lögreglunnar í vændismálum. Undanfarnar vikur hafi embættið staðið í sérstökum aðgerðum tengdum mansali en vændi sé ein af birtingarmyndum mansals. Engar frekari skýringar eru þó gefnar hvað þetta varðar, né heldur er birt nánari tölfræði.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir