Íslendingum sagt að ferðast ekki og þeir sem eru erlendis hvattir til að koma heim

Íslensk stjórn­völd hvetja Íslend­inga sem eru á ferða­lagi erlendis til að flýta heim­för og ráða lands­mönnum frá því að leggj­ast í ferða­lög.

Þetta kemur fram í til­kynn­ingu frá utan­ríkis- og þró­un­ar­sam­vinnu­ráðu­neyt­inu vegna til­lögu Guðlaugs Þórs Þórð­ar­sonar, ráð­herra mála­flokks­ins, þess efnis í ljósi þeirra yfir­grips­miklu ráð­staf­ana sem erlend ríki hafa gripið til til að hefta útbreiðslu COVID-19 og kunna að hafa áhrif á Íslend­inga erlendis. „Víða eiga Íslend­ingar á hættu að verða inn­lyksa eða lenda í sótt­kví við erf­iðar aðstæður. Ekki er víst hvaða aðgang og rétt­indi Íslend­ingar munu hafa að heil­brigð­is­þjón­ustu auk þess sem heil­brigð­is­kerfi í mörgum ríkjum anna ekki álagi,“ segir Guð­laugur Þór „Í því ljósi höfum við ákveðið að ráða Íslend­ingum gegn ferða­lögum erlendis og þeim sem eru á ferða­lagi erlendis að íhuga að snúa heim fyrr en ella.“

[adspot]Í til­kynn­ing­unni segir að mörg erlend ríki hafi und­an­far­inn sól­ar­hring gripið til þess að loka landa­mærum og skylda alla sem þangað koma í sótt­kví. „Ekki er hægt að úti­loka að fleiri ríki muni grípa til svip­aðra ráð­staf­ana á næstu dögum. Það er mat utan­rík­is­ráðu­neyt­is­ins, að höfðu sam­ráði við for­sæt­is­ráð­herra, heil­brigð­is­ráð­herra, sótt­varn­ar­lækni og almanna­varnir, að tíma­bært sé að ráða Íslend­ingum form­lega frá því að leggja upp í ferða­lög. Þá eru Íslend­ingar á ferða­lagi erlendis beðnir að íhuga hvort ástæða sé til að flýta heim­för með til­liti til ofan­greindra þátta og Íslend­ingar búsettir erlendis hvattir til að kanna rétt sinn til heil­brigð­is­þjón­ustu.“

Katrín Jak­obs­dóttir for­sæt­is­ráð­herra segir að með þessum ráð­legg­ingum sé brugð­ist við þeirri stöðu sem upp er komin vegna við­bragða margra ríkja við far­aldr­inum sem nú geisar. „Þær hafa að sjálf­sögðu mikil áhrif á sam­fé­lag okkar og stöðu Íslend­inga á ferða­lögum erlendis.“

Áfram gilda skil­grein­ingar sótt­varn­ar­læknis um áhættu­svæði og til­mæli hans um að Íslend­ingar sem þaðan komi fari í sótt­kví. Ekki er gert ráð fyrir að tak­marka ferðir erlendra ferða­manna hingað til lands.

Utan­rík­is­ráðu­neytið og sendi­skrif­stofur Íslands hafa unnið að því síð­asta sól­ar­hring að afla upp­lýs­inga frá stjórn­völdum ríkja um hvernig flugi og öðrum sam­göngum verður háttað yfir landa­mæri til að tryggja að Íslend­ingar kom­ist heim.

Icelandair mun fella niður fjölda ferða

Icelandair var­aði við því í upp­hafi viku að félagið væri að end­ur­skoða flug­ferðir sínar í mars og apr­íl, sem áttu að vera um 3.500, og að það mætti búast við því að þeim myndi fækka enn meira en þegar hafði verið til­kynnt um. Það væri til­komið vegna enn meiri sam­dráttar í eft­ir­spurn og bók­un­um. Síðan að sú til­kynn­ing var send út hefur staða Icelandair versnað umtals­vert.

Á mið­nætti tók gildi ferða­bann til Banda­ríkj­anna, en við­skipta­módel Icelandair snýst að uppi­stöðu um að ferja far­þegar milli Evrópu og Banda­ríkj­anna með við­komu á Íslandi. Til við­bótar tók í dag gildi ferða­bann til Dan­merkur sem einnig er mik­il­vægur áfanga­staður í leið­ar­kerfi Icelandair. Ljóst er að fyr­ir­hug­uðum ferðum Icelandair í mars og apríl hið minnsta muni fækka langt umfram það sem lagt var upp með í byrjun.

Á ferða­þjón­ustu­frétta­vefnum Túrista var í vik­unni tekið saman að Icelandair hafi að jafn­aði flutt um 3.100 far­þega á degi hverjum milli Íslands og Banda­ríkj­anna í mars og apríl í fyrra sam­kvæmt tölum frá banda­rískum flug­mála­yf­ir­völdum. Þar kom einnig fram að 39 pró­sent af tekjum Icelandair á síð­asta ári hafi komið frá Norður-Ameríku.

Ákveði Icelandair að fljúga ekki tómum vélum út næstu vik­urnar gæti skap­ast hætta á að þeir Íslend­ingar sem eru staddir í Banda­ríkj­unum gætu átt í erfitt með að kom­ast heim.