Björn Ingi Hrafnsson, útgefandi DV og Vefpressunnar, segir að Sigmundur Davíð Gunnlaugsson forsætisráðherra hafi ekki fjármagnað kaup Pressunnar á DV og eigi ekki hlut í blaðinu. Þetta segir hann í stöðuuppfærslu á Facebook-síðu sinni. Vísir greindi fyrst frá því í morgun að systurnar og fjölmiðlakonurnar Hlín Einarsdóttir og Malín Brand hafi játað að hafa sent Sigmundi Davíð bréf þar sem þær kröfðust milljóna af honum ellegar þær gerðu opinberar viðkvæmar upplýsingar honum tengdar. Þær eru sagðar hafa haft undir höndum upplýsingar sem áttu að tengja Sigmund við kaup Björns Inga á DV í nóvember síðastliðnum. Hlín var ritstjóri á Bleikt.is og þau Björn Ingi voru í sambandi um nokkurra ára skeið. Malín er blaðamaður á Morgunblaðinu en er nú komin í leyfi fram til 1. ágúst. „Ég er harmi sleginn yfir fregnum dagsins. Hugur minn er hjá þeim sem um sárt eiga að binda vegna þessa máls. Forsætisráðherra fjármagnaði ekki kaup Pressunnar á DV. Hann á ekki hlut í blaðinu. Að öðru leyti óska ég eftir því að tekið sé tillit til þess að hér er mannlegur harmleikur á ferðinni og að aðgát skuli höfð í nærveru sálar,“ skrifar Björn Ingi á Facebook.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir