Alls sögðu 2.477 sig úr þjóðkirkjunni á síðustu þremur mánuðum ársins 2017. Á sama tímabili gengu 231 í hana. Því gengu 2.246 fleiri landsmenn úr þjóðkirkjunni en í hana á tímabilinu. Þegar allt árið 2017 er skoðað kemur í ljós að 3.738 sögðu sig úr þjóðkirkjunni, þar af 60 prósent á síðustu mánuðum ársins. Á sama tímabili gengu 719 manns í kirkjuna. Þegnum hennar fækkaði því um 3.019 á síðasta ári.
[links]Þetta kemur fram í nýjum tölum frá Þjóðskrá Íslands um breytingar á trú- og lífskoðunarfélagsaðild á síðasta ársfjórðungi 2017.
Ekki siðferðislega rétt að stela gögnum og tugprósenta launahækkun
Agnes M. Sigurðardóttir, biskup Íslands og leiðtogi þjóðkirkjunnar, rataði tvívegis í fréttir á síðustu mánuðum ársins 2017 vegna mála sem þóttu umdeild. Fyrst sagði hún í samtali við Morgunblaðið að henni þætti ekki siðferðislega rétt að stela gögnum og fara á bak við fólk til að afhjúpa mál og leiða sannleikann í ljós. Þessi ummæli féllu í samhengi við lögbann sem Sýslumaðurinn á höfuðborgarsvæðinu hafði samþykkt gagnvart fjölmiðlafyrirtækjunum Stundinni og Reykjavík Media, vegna birtingar þeirra á fréttum sem unnar voru úr gögnum úr gamla Glitni.
[adspot]Síðara málið sem kom upp var í desember, þegar kjararáð ákvað að hækka laun Agnesar um tugi prósenta. Heildarlaun hennar eftir hækkunina eru 1.553.359 krónur. Hækkunin var auk þess afturvirk til 1. janúar 2017, samkvæmt úrskurðinum. Um áramót fékk því biskupeingreiðslu fyrir síðasta árið en sú upphæð nemur 3,3 milljónir króna. Hækkunin kom í kjölfar bréfs sem biskup sendi kjararáði þar sem ýmis rök voru færð fyrir því að hún ætti að fá launahækkun. Sérstaklega var tilgreint að biskup greiddi nú húsaleigu fyrir afnot af embættisbústað sem henni er skylt að búa í. Í Fréttablaðinu þann 28. desember var greint frá því að leigan fyrir biskupsbústaðinn, sem er 487 fermetra hús í miðborg Reykjavíkur, væri tæplega 90 þúsund krónur á mánuði.
Yfir eitt hundrað þúsund utan þjóðkirkju
Frá árinu 2009 hefur fjöldi þeirra sem skráðir eru í þjóðkirkjunni dregist saman á hverju einasta ári. Í byrjun árs 2017 voru þeir 236.481 talsins, sem þýddi að undir 70 prósent þjóðarinnar væri í kirkjunni.
Nú eru þeir 233.462 og fækkaði, líkt og áður sagði, um 3.019 á síðasta ári. Alls sögðu 3.738 manns sig úr kirkjunni á árinu 2017.
Það er næstmesti fjöldi sem hefur sagt sig úr kirkjunni á einu ári. Metið var sett á árinu 2010, þegar ásakanir um þöggun þjóðkirkjunnar yfir meintum kynferðisglæpum Ólafs Skúlasonar, fyrrverandi biskups, voru settar fram. Þá fækkaði um 4.242 í þjóðkirkjunni á einu ári.
Þegnum kirkjunnar hefur fækkað mjög hlutfallslega á undanförnum árum. Árið 1992 voru 92,2 prósent landsmanna skráðir í hana. Á árunum fyrir hrun fjölgaði alltaf lítillega í hópi þeirra sem skráðir voru í þjóðkirkjuna á milli ára þótt þeim Íslendingum sem fylgdu ríkistrúnni fækkaði alltaf hlutfallslega. Ein ástæða þess er að skipulagið hérlendis var lengi vel þannig að nýfædd börn voru ætið skráð í trúfélag móður. Það þurfti því sérstaklega að skrá sig úr trúfélagi í stað þess að skrá sig inn í það. Þessu var breytt árið 2013 og nú þurfa báðir foreldrar að tilheyra sama trú- og lífsskoðunarfélagi til að barnið sé skráð í félag, annars skráist barnið utan trúfélaga.
Frá árinu 2009 hefur meðlimum þjóðkirkjunnar fækkað á hverju ári. Þeir voru 236.260 í byrjun árs 2017, eða 69,9 prósent mannfjöldans. Það var í fyrsta sinn síðan að mælingar hófust sem að fjöldi meðlima hennar fer undir 70 prósent mannfjöldans.
Miðað við mannfjöldatölur í lok þriðja ársfjórðungs síðasta árs eru nú 69 prósent þjóðarinnar í þjóðkirkjunni.
Þeim íslensku ríkisborgurum sem kusu að standa utan þjóðkirkjunnar voru 30.700 um síðustu aldarmót. Þeir eru nú yfir eitt hundrað þúsund. Fjöldi þeirra hefur því rúmlega þrefaldast.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir