Íslandsbanki telur að stýrivextir verði hækkaðir um 1,25 prósentustig á árinu, samhliða rúmlega fjögurra prósenta hagvexti. Einnig býst bankinn við að húsnæðisverð takist að róast meðfram vaxtahækkununum og auknu framboði íbúða. Þetta kemur fram í nýrri þjóðhagsspá Íslandsbanka, sem birtist á vef bankans í morgun.
Sterkt gengi, margir túristar og lítið atvinnuleysi
Þjóðhagsspáin er nokkuð björt, en í henni er gert ráð fyrir að allt að 1,2 milljónir ferðamanna komi til landsins í ár og að gengið styrkist um átta til níu prósent yfir árið. Sömuleiðis býst bankinn við að atvinnuleysi hjaðni og verði að meðaltali 4,5 prósent á árinu.
Bankinn telur einnig að verðbólgan, sem mælist nú um fimm prósent, verði komin niður í 3,2 prósent í lok þessa árs og rétt undir 2,5 prósenta verðbólgumarkmiðinu á næsta ári. Sú spá byggir á væntri gengissstyrkingu krónunnar á árinu, auk væntinga um að kjarasamningar ógni ekki verðstöðugleika, að framboðshnökrar sem hafa orðið erlendis hverfi á árinu og að íbúðaverð hækki mun minna en í fyrra.
Minni hækkun íbúðaverðs
Forsendan um minni verðhækkanir á íbúðamarkaði byggja á vonum um að húsnæðisframboð taki við sér á árinu. Samkvæmt bankanum rímar þær vonir við talningu Samtaka iðnaðarins frá september síðastliðnum, en samkvæmt þeim var töluverð aukning á íbúðum í byggingu á höfuðborgarsvæðinu á fyrri byggingarstigum.
Íslandsbanki nefnir einnig að Seðlabankinn hafi gripið til ýmissa aðgerða til að stemma stigu við hraða hækkun íbúðaverðs. „Þessar aðgerðir munu koma til með að hafa áhrif á íbúðamarkaðinn í vaxandi mæli á komandi misserum,“ segir í spánni.
Ein þessara aðgerða var hækkun stýrivaxta, en þeir fóru úr 0,75 prósentum í tvö prósent í fyrra. Íslandsbanki gerir ráð fyrir að vextirnir muni halda áfram að hækka jafnhratt og enda í 3,25 prósentum í lok ársins. Samkvæmt bankanum er langtímajafnvægi stýrivaxta þó nálægt fjórum prósentum, svo búist er við áframhaldandi vaxtahækkun á næsta ári.
Síðasta ár umfram spár
Þrátt fyrir nýjar og óvæntar bylgjur af kórónuveirufaraldrinum var efnahagsþróunin á síðasta ári mun betri en Íslandsbanki gerði ráð fyrir í þjóðhagsspánni sinni í janúar 2021. Þar bjóst bankinn við að 9,4 prósenta atvinnuleysi að meðaltali yfir árið og 3,2 prósenta hagvexti. Bankinn áætlar nú að atvinnuleysið hafi einungis verið 7,7 prósent að meðaltali í fyrra en að hagvöxturinn hafi alls náð 4,1 prósenti.
Samkvæmt Íslandsbanka hafa undanfarnir ársfjórðungar sýnt fram á þol hagkerfisins gagnvart sveiflum og smitum í sóttvörnum. Því myndi þrálátari faraldur í versta lagi seinka þeim hagvexti sem búist er við, en líklega ekki riðla honum að ráði til meðallangs tíma.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir