Verðmiðinn á Bláa Lóninu tæplega fimmfalt bókfært virði

Blávarmi slhf., félag í eigu 14 íslenskra líf­eyr­is­sjóða, keypti 30 pró­sent hlut HS Orku í Bláa lón­inu á tæp­lega fimm­földu bók­færðu virði hlut­ar­ins.

[links]Í nýjasta árs­reikn­ingi HS Orku, fyrir árið 2018, er hlut­ur­inn bók­færður á 3,3 millj­arða króna og hafði þá hækkað um 600 millj­ónir króna milli ára.

Blávarmi keypti hins vegar hlut­inn á 15 millj­arða króna. Miðað við það er virði Bláa Lónsins 50 millj­arðar króna.

Salan á hlutnum í Bláa Lóninu fór fram eftir að Jarð­varmi slhf., félag í eigu sömu líf­eyr­is­sjóða, hafði eign­ast allt hlutafé í HS Orku í síð­ustu viku. Eftir að 30 pró­sent hlut­ur­inn í Bláa Lóninu var seldur til Blávarma seldi Jarð­varmi síðan helm­ingin í HS Orku til breska sjóðs­stýr­ing­ar­fyr­ir­tæk­is­ins Ancala Partners, sem sér­hæfir sig í inn­viða­fjár­fest­ingum í Evr­ópu og er að stóru leyti fjár­magnað af breskum líf­eyr­is­sjóð­um.

[adspot]Jarð­varmi ákvað að nýta for­kaups­rétt sinn og ganga inn í tvenn við­skipti með hluti í HS Orku sem fyrr­ver­andi meiri­hluta­eig­and­inn Innergec og Fjár­fest­ing­ar­sjóð­ur­inn ORK voru að selja.

Tilboði hafnað 2017

Sumarið 2017 reyndi HS Orka, með stuðn­ingi Ross Beaty stjórn­ar­for­manns og Innergex, að selja 30 pró­sent hlut­inn í Bláa Lóninu til banda­ríska fjár­fest­inga­fé­lags­ins Blackstone.

Til­boð Blackstone hljóð­aði þá upp á 95 millj­ónir evra, jafn­virði 13,1 millj­arða króna á núver­andi gengi.

Ekk­ert varð hins vegar af söl­unni eftir að stjórn Jarð­varma ákvað að beita neit­un­ar­valdi sínu, á grund­velli hlut­hafa­sam­komu­lags um minni­hluta­vernd, og hafna til­boði Blackstone. Sú ákvörðun vakti ekki mikla lukku á meðal erlendra eig­enda HS Orku.