Seldu nær heila götu og fengu 2,2 milljarða hvor

Bergþór Jónsson og Fritz Hendrik Berndsen, sem starfað hafa saman í bygg­ing­ar­iðn­að­inum um nokk­urt skeið, fengu hvor um sig 2,2 millj­arða í fjár­magnstekjur í fyrra, eða sam­tals 4,4 millj­arða króna, sam­kvæmt álagn­ing­ar­skrá rík­is­skatt­stjóra.

Bergþór og Fritz, sem reka saman fjölda fast­eigna- og bygg­inga­fé­laga, meðal ann­ars félagið Mótás, seldu fast­eigna­fé­lag sitt Vín­lands­leið ehf. til Reita á 5,9 millj­arða króna í fyrra. Félagið á rúm­lega 18.000 leigu­fer­metra af hús­næði í nær öllum fast­eignum við sam­nefnda götu. Þessar fast­eignir eru Vín­lands­leið 2-4, 6-8, 12-14 og 16 auk Norð­linga­brautar 14. Áttu Bergþór og Fritz hvor um sig helm­ing í félag­inu.

„Við leggjum eitt­hvað gott til þjóð­fé­lags­ins“

Eign­irnar eru í útleigu til 12 aðila, en flestir þeirra eru opin­berir aðilar sem eru á fjár­lögum rík­is­ins. Þeir eru Sjúkra­trygg­ingar Íslands, Matís ohf., Lög­reglu­stjór­inn á höf­uð­borg­ar­svæð­inu, Lyfja­stofnun og Fjöl­mennt. Leigu­tekjur á árs­grunni eru um 440 millj­ónir króna og er með­al­tími leigu­samn­inga um 13 og hálft ár.

„Við vorum bara að selja fast­eigna­fé­lag á síð­asta ári,“ segir Bergþór aðspurður um fjár­magnstekjur sínar á síð­asta ári. „Það voru Reitir sem keyptu þetta af okkur.“

Vín­lands­leiðFélagið á flest húsin við göt­una og eru fast­eign­irnar að mestu í útleigu til opin­berra aðila.

Leiddu kaupin til þess að áætl­aður rekstr­ar­hagn­aður Reita hækk­aði um 350 millj­ónir króna á árs­grund­velli sam­kvæmt til­kynn­ingu félags­ins til kaup­hall­ar­innar. Afkoma árs­ins var rúmar 28 millj­ónir króna árið 2017 á meðan Bergþór og Fritz áttu félagið, en 3,1 millj­arður króna árið 2018. Má hagn­að­inn alfarið rekja til mats­breyt­inga fjár­fest­ing­ar­eigna, sam­kvæmt árs­reikn­ingi 2018. Reitir tóku við félag­inu í sept­em­ber það ár og greiddi Vín­lands­leið Reitum 149 millj­ónir króna í arð á árinu. Eignir félag­ins í lok árs­ins voru metnar á tæpa 6,3 millj­arða króna og nam eigið fé 3,7 millj­örðum.

Launa­tekjur Bergþórs árið 2018 voru hins vegar aðeins 290 þús­und krónur á mán­uði og launa­tekjur Fritz 446 þús­und krónur á mán­uði. Greiddu þeir því sam­tals aðeins um 1,3 millj­ónir króna í útsvar á árinu, en báðir eru búsettir í Reykja­vík. Segir Bergþór að engin starf­semi sé í félagi þeirra Mótási lengur.

Af fjár­magnstekj­unum renna um 486 millj­ónir króna til rík­is­sjóðs í formi fjár­magnstekju­skatts. „Við leggjum eitt­hvað gott til þjóð­fé­lags­ins,“ segir Bergþór.