Mig langar að tala um verkefni sem ég tók þátt í fyrir tveimur árum sem hefur ennþá áhrif á líf mitt í dag. Ég gerði leikmynd fyrir tónlistarvídeó sem heitir I'd love eftir tónlistarmanninn Auður. 

Þetta gerðist í lok sumars eða byrjun hausts 2017. Á þeim tíma var ég í Myndlistaskólanum í Reykjavík og hafði einungis verið að sinna skólaverkefnum en hafði rosalegan áhuga á leikmyndagerð.  Ég þekkti aðeins til Auðuns, við vorum kunningjar. Hann hafði heyrt útundan sér að ég væri að daðra við einhvers konar smíðavinnu og leikmyndastúss. 

Hann hafði samband við mig eftir að ég var áhorfandi á sýningu hjá honum hjá Improv Ísland í Tjarnarbíói. Hann nálgaðist mig eftir sýninguna með hugmynd að tónlistarvídeói og að hann langaði mikið að framkvæma hana. Hugmyndin var stór í sniðum og hann vissi ekki alveg hvernig hann ætti að fara að því að framkvæma hana en vildi fá mig með. Við tókum svo næst fund og svo varð verkefnið að veruleika og heppnaðist ótrúlega vel. 

Í kjölfarið á því fékk ég fjöldann allan af öðrum tækifærum og varð fljótlega orðinn starfandi leikmyndahönnuður. Ég hef fengið stærri og stærri verkefni með tímanum og ég upplifi eins og það hafi allt með þetta tónlistarvídeó að gera. 

Svo eru líka öll tengslin og vináttan sem hefur skapast. Ég og Auðunn kynntumst ótrúlega vel í þessu verkefni og nú erum við mjög nánir, jafnvel bestu vinir, og störfum ennþá saman í dag.