Hægri öfgamaður frá Ástralíu myrti 49 manns og særði 20 til viðbótar í hryðjuverkaárás á tvær moskur í Christchurch á Nýja-Sjálandi. Árásin hefur verið fordæmd um allan heim, en fréttavefurinn Vísir.is þurfti að loka á ummæli undir frétt sinni um árásina vegna þess að nafngreindir Íslendingar fögnuðu henni.
„Athugasemdakerfinu hefur verið lokað við þessa frétt vegna hatursfullra ummæla,“ segir í lok fréttar Vísis.
Meðal ummæla sem um ræðir eru tveir sem töldu að morðin væru réttlætanleg og æskileg. „Vel gert. Þetta er sjálfsvörn. Fólk er varla búið að gleyma hvað marga íslam hefur drepið í Evrópu,“ sagði einn þeirra. Ekki er hægt að staðfesta að um raunverulegan aðgang sé að ræða.
Annar sem fagnar árásinni opinberlega er hins vegar búsettur á Sauðárkróki og hefur reglulega tjáð sig um múslima og innflytjendamál.
Að sögn Íslendings sem býr í Christchurch bjóst enginn við slíkri árás þar. Borgin sé ekki ólík Reykjavík og þykir friðsæl.
Katrín Jakobsdóttir forsætisráðherra og Guðlaugur Þór Þórðarson utanríkisráðherra hafa sent Nýsjálendingum samúðarkveðjur vegna árásarinnar.
Árásarmaðurinn, Brenton Tarrant, er ástralskur ríkisborgari. Hann sendi frá sér 74 síðna stefnuyfirlýsingu þar sem hann lýsti aðdáun á norska hryðjuverkamanninum Anders Breivik og lofaði meðal annars Donald Trump Bandaríkjaforseta fyrir að vera „tákn endurreistrar sjálfsmyndar hvítra og sameiginlegs tilgangs“.
Meðal þeirra sem berjast fyrir lífi sínu eftir árásina eru börn niður í fjögurra ára aldur.
Athugasemdir