„Þetta var rétt ákvörðun hjá Bjarna í þetta skiptið, að axla ábyrgð,“ segir Kristrún Frosta­dóttir, for­maður Sam­fylk­ing­ar­innar, í sam­tali við Heim­ild­ina. 

Bjarni Bene­dikts­son, fjár­mála- og efna­hags­ráð­herra, sagði af sér sem ráð­herra á blaða­manna­fundi í morgun. Umboðs­maður Alþingis hefur kom­ist að þeirri nið­ur­stöðu að Bjarni var ekki hæfur til að selja föður sínum, Benedikt Sveins­syni, hluti í Íslands­banka á síð­asta ári.

„Það var alveg rétt sem hann lét hafa eftir sér að honum var ekki kleift lengur að sinna sínum verk­efnum,“ segir Kristrún. Áður hafði Bjarni sagt að hann hafi aldrei hafa hug­að að van­hæfi sínu við sölu á eign­ar­hlut rík­is­ins í Ís­lands­banka þrátt fyr­ir að fað­ir hans væri með­al kaup­enda. Á opn­um fundi í fjár­laga­nefnd um söl­una í apríl í fyrra sagði hann lög­skýr­ing­ar um van­hæfi sitt sam­kvæmt stjórn­sýslu­lög­um frá­leit­ar.

Enn önnur niðurstaðan um ábótavant útboð

„Í mínum huga er þetta ein­falt mál. Hann braut hæf­is­reglur. Hann bar fyrir sig, sem var mjög fyr­ir­sjá­an­legt, að fyr­ir­komu­lag söl­unnar hafi verið með þeim hætti að hann hefði ekki getað vitað hver var að kaupa. Þá var auð­vitað fyr­ir­komu­lag söl­unnar ekk full­nægj­andi, vegna þess að hann getur ekki sagt sig frá hæf­is­reglum. Þetta er enn önnur nið­ur­staðan sem sýnir að utan­um­haldið um þetta útboð var veru­lega ábóta­vant,“ segir Kristrún. 

Afsögn Bjarna eru mikil tíma­mót að sögn Kristrúnar. „Maðurinn hefur verið fjár­mála­ráð­herra nær óslitið í að verða ára­tug.“ Af hverju hann tekur þessa ákvörðun nú segir Kristrún hægt að skýra með upp­söfn­uðum nið­ur­stöðum af þeim úttektum sem fram­kvæmdar hafa verið um sölu­ferlið. 

Í úttekt Rík­is­end­ur­skoð­unar kom fram að jafn­ræðis hafi ekki verið gætt í útboð­inu. „Svo fáum við nið­ur­stöðu FME þar sem kemur fram að þetta útboð hafi verið á eins konar sjálf­stýr­ingu. Og núna erum við að fá nið­ur­stöðu frá umboðs­manni sem snýr sér­stak­lega að hæfi ráð­herra í útboð­inu. Ég veit auð­vitað ekki hvað fer í gegnum huga ráð­herra en ég get rétt ímyndað mér að upp­safnað þá hljóti þetta að hafa tals­verð áhrif og að hann hafi ein­fald­lega upp­lifað að hann gæti ekki staðið undir þessu hlut­verki í fram­hald­inu,“ segir Kristrún.

„Hann er að hætta á þeim for­sendum að honum sé ekki kleift að sinna sínum verk­efnum lengur og ég held að rík­is­stjórnin í heild sinni þurfi að svara þeirri spurn­ingu hvort henni sé í raun kleift að sinna þeim verk­efnum sem nú liggja fyrir og skipta fólkið í land­inu mestu máli.

Þá er okkur í Sam­fylk­ing­unni mest umhugað um stöð­una í efna­hags­málum og stóru vel­ferð­ar­málum. Ég veit auð­vitað ekki frekar en almenn­ingur í land­inu þau munu taka, við þurfum að bregð­ast við því eftir sem dag­ur­inn þró­ast.“

Vill setja söluna á ís

„Við erum auð­vitað til­búin í kosn­ingar, en það er ekki í okkar höndum,“ segir Kristrún. 

Gert er ráð fyrir frek­ari sölu á hlut rík­is­ins í Íslands­banka í fjár­laga­frum­varpi rík­is­stjórn­ar­innar. Kristrún segir að áform um frek­ari sölu hljóti að verða sett á ís. 

„Mér var brugðið þegar ég sá að það var gert ráð fyrir í núver­andi fjár­laga­frum­varpi að það yrði klárað að selja Íslands­banka. Það voru ekki for­sendur til þess í upp­hafi vetrar, þær eru svo sann­ar­lega ekki til staðar núna. Að mínu mati er ekki búið að skapa frið um áfram­hald­andi sölu þó Bjarni Bene­dikts­son hafi stigið til hliðar. Það er ýmis­legt annað sem þarf að skoða í þessu sam­hengi en það hlýtur að vera að áfram­hald­andi sala verði sett á ís.“  

Þing­flokkur Sam­fylk­ing­ar­innar mun funda og fara yfir stöð­una áður en þing­fundur hefst klukkan 13:30. Aðspurð við hverju megi búast á þing­fundi segir Kristrún að það fari eftir þróun mála næstu mín­út­urnar hrein­lega.