Aðalsteinn Leifsson ríkissáttasemjari segir við Heimildina að það sé ekkert eitt umfram annað sem valdi því að hann hefur ákveðið að láta af embætti ríkissáttasemjara, heldur hafi undanfarin ár einfaldlega verið mjög krefjandi og hann telji komið gott, eftir rúm þrjú ár sem ríkissáttasemjari.
„Undanfarin ár hafa verið mjög krefjandi, en að sama skapi árangursrík, það hefur alltaf tekist að finna lendingar og lausnir í mörgum þungum erfiðum kjaradeilum. Eftir að hafa verið vakinn og sofinn yfir þessu verkefni núna í nokkur ár finnst mér komið gott og kveð þetta starf, ánægður með árangurinn og þakklátur fyrir allt það góða fólk sem ég hef kynnst. En um leið langar mig að snúa mér að nýjum verkefnum,“ segir Aðalsteinn við Heimildina.
„Það var ég sem átti frumkvæðið að þessu og er sáttur og ánægður bæði með farinn veg og það sem framundan er,“ bætir hann við.
Aðspurður segir hann ekkert eitt valda þessari ákvörðun. Nú sé bara „komið gott“ og tímapunkturinn til að láta af störfum sé ákjósanlegur, en undirbúningur sé að hefjast í Karphúsinu fyrir næstu stóru kjaralotu á almennum vinnumarkaði.
„Þú veist hvernig það hefur verið, það hefur verið mikil togstreita á vinnumarkaði og margar þungar og erfiðar kjaradeilur og það hefur verið mikil vinna að finna leiðina að lausninni sem oft og tíðum hefur verið þyrnum stráð. Ég er mjög sáttur með að þessi vinna hefur gengið vel og tekist, en að sama skapi hefur þetta verið oft og tíðum vinna allan sólarhringinn svo vikum skiptir,“ segir Aðalsteinn.
Hann segist áfram verða til staðar fyrir sáttasemjaraembættið og hjálpa til með þau mál sem þegar eru til staðar hjá embættinu, að allir boltast haldist á lofti og þau sem þangað leita fái góða þjónustu og samfellu.
Ástráður Haraldsson héraðsdómari tekur við embætti sáttasemjara á morgun tímabundið. „Ég verð til staðar fyrir hann eins og hann telur henta,“ segir Aðalsteinn.
Hefur gætt þess að tala ekki um valdheimildir embættisins
Spurður beint að því hvort sú ákvörðun Guðmundar Inga Guðbrandssonar félags- og vinnumarkaðsráðherra, að fresta fyrirhugaðri lagasetningu sem sögð var eiga að miða að því að tryggja heimildir ríkissáttasemjara til að leggja fram miðlunartillögu í kjaradeilum, svarar Aðalsteinn neitandi og bætir við að hann telji ekki rétt að tjá sig um skoðun sína á heimildum embættisins.
„Nei, það er þannig að ríkissáttasemjari starfar innan þess lagaramma sem Alþingi ákveður og túlkun dómstóla á lagaheimildunum hverju sinni. Ég hef gætt þess mjög vandlega að tala ekki um valdheimildir ríkissáttasemjara, þær eru viðfangsefni stjórnmálanna. [...] Ég hef gætt þess mjög vandlega að tala ekki um valdheimildir embættisins, því þá er maður kominn í pólitík og það skemmir einfaldlega fyrir verkefninu, sem er sáttamiðlun.“
Ertu búinn að ákveða hvað tekur við hjá þér?
„Á næstunni verð ég í þessu verkefni að aðstoða hér og er með verkefni líka sem miðar að því að skoða og kanna líðan og viðhorf og starfsaðstæður samninganefnda. Ég ætla að skila af mér skýrslu um það og mögulega taka að mér einhver tilfallandi verkefni fyrir ráðuneytið á næstunni. Hvað tekur síðar við, ég tala bara um það seinna, en það er ekkert sem truflar þessi ábyrgðarstörf sem ég ætla að klára núna,“ segir fráfarandi ríkissáttasemjari.
Athugasemdir