Meirihluti íbúa telur stórfyrirtækið reyna að kaupa sér velvild með fjárstyrkjum

Meiri­hluti íbúa í Ölfusi telur að þýska sem­ents­fyr­ir­tækið Heidel­berg sé að reyna að kaupa sér vel­vild íbúa í sveit­ar­fé­lag­inu með því að veita félaga­sam­tökum þar fjár­styrki. Þetta er nið­ur­staðan úr könnun sem Maskína vann fyrir Heim­ild­ina. Heidel­berg veitti 3,5 millj­óna króna styrki til slíkra félaga í Ölfusi fyrir jól, meðal ann­ars til björg­un­ar­sveit­ar­innar Mann­bjargar.  Heim­ildin fjall­aði um styrk­ina nú í jan­úar. 

Heidel­berg ætlar að byggja verk­smiðju í Þor­láks­höfn sem á að mala móberg til útflutn­ings. Móbergs­muln­ing­inn á svo að nota í sem­ents­gerð.  Bygging verk­smiðj­unnar er umdeild í Þor­láks­höfn og Ölfusi og sýnir við­horfskönnun Maskínu til dæmis að rúm­lega tvö­falt fleiri íbúar eru á móti verk­smiðj­unni en eru fylgj­andi henni. Áður en af bygg­ingu verk­smiðj­unnar verður ákveðin mun fara fram íbúa­kosn­ing um hana. Heidel­berg þarf því á end­anum að stóla á stuðn­ing íbúa Ölfuss ef verk­smiðjan á að verða byggð. 

Meirihluti bæjarbúa ósammála Þorsteini

Þor­steinn Víglunds­son, tals­maður Heidel­bergs á Íslandi og fyrr­ver­andi ráð­herra, steig fram í kjöl­far frétta­flutn­ings Heim­ild­ar­innar um styrk­ina og sagði að það væri af og frá að fyr­ir­tækið væri að reyna að kaupa sér vel­vild með styrkj­unum. „Fyr­ir­tækið hafnar alfarið grófum aðdrótt­unum um nokk­urs konar mútu­starf­semi eða óeðli­leg sam­skipti í því skyni að kaupa sér vel­vild eða fyr­ir­greiðslu.“

Miðað við svör íbúa í Ölfusi um styrk­veit­ingar Heidel­bergs í könnun Maskínu telur meiri­hluti þeirra hins vegar að þýska fyr­ir­tækið sé að reyna að kaupa sér vel­vild íbúa með styrkj­unum. 52,5 pró­sent þeirra sem svör­uðu voru fremur eða mjög sam­mála því að Heidel­berg væri að reyna að kaupa sér vel­vild íbúa í Ölfusi á meðan 24,3 pró­sent voru mjög eða fremur ósam­mála því að sem­ents­fyr­ir­tækið væri að reyna að kaupa sér vel­vild íbú­anna. 

Þor­steinn segir í við­tali við Heim­ild­ina í dag að honum þyki sú túlkun „súr að Heidel­berg sé að reyna að kaupa sér stuðn­ing íbúa: „Bara svo það sé skýrt, og það var þetta sem mér mis­bauð í ykkar frétta­flutn­ingi, að það að líta á sam­fé­lags­lega styrki sem til­raun til að bera fé á fólk og hafa áhrif á umræð­una í sam­fé­lag­inu finnst mér algjör­lega fjar­stæðu­kennt. Mér dettur ekki í hug að styrkir okkar til sam­fé­lags­legra verk­efna í Þor­láks­höfn breyti nokkru um það hvort fólk vilji hafa þessa verk­smiðju þarna eða ekki.“

Miðað við svör íbúa Ölfuss í könnun Maskínu er meiri­hluti þeirra ósam­mála þess­ari túlkun Þor­steins og Heidel­bergs á til­gangi fjár­styrkj­anna.