Bíó Tvíó, hlaðvarpið um íslenskar kvikmyndir, hefur aftur göngu sína með vikulegum þáttum hér á Stundinni. Stjórnendur hafa sett sér það markmið að fjalla um hverja einustu kvikmynd Íslandssögunnar og eru langt komin áleiðis nú þegar þáttur númer 218 er kominn í loftið.
Nýjasti þátturinn fjallar um kvikmyndina Ölmu sem kom út árið 2021 í leikstjórn Kristínar Jóhannesdóttur. Stjórnendur Bíó Tvíó eru Andrea Björk Andrésdóttir og Steindór Grétar Jónsson sem hafa séð um þættina síðan þeir hófu göngu sína árið 2016.
„Við héldum upphaflega að þetta yrðu um 200 myndir sem við gætum klárað með vikulegum þáttum á nokkrum árum, en svo eru alltaf að koma út nýjar íslenskar kvikmyndir,“ segir Andrea Björk. „Svo eru sumar myndir óaðgengilegar, bæði gamlar og jafnvel nýjar. Við erum mjög þakklát Kvikmyndasafni Íslands fyrir að hjálpa okkur að nálgast sumar af þeim sem er erfitt að finna annars staðar.“
Til viðbótar þáttunum vef Stundarinnar munu stjórnendur bjóða vikulega aukaþætti, Bónus Tvíó, sem hægt er að nálgast á Patreon síðu stjórnenda. „Við ætlum að fjalla um íslenskar heimildarmyndir, stuttmyndir og sjónvarpsefni, alls konar skemmtilegt sem hlustendur þáttanna hafa kallað eftir,“ segir Andrea. „Fyrsti þátturinn fjallar um frumraun Óskars Jónassonar leikstjóra, tilraunakennda sci-fi stuttmynd sem heitir Oxsmá plánetan og var gerð af pönkabilly-listahópnum Oxsmá árið 1983.“
Þætti Bíó Tvíó má nálgast hér á Stundinni og í öllum helstu hlaðvarpsveitum og aukaþættina Bónus Tvíó má finna á Patreon.
Athugasemdir