Oddný Cara Edwards hefur búið og starfað í Englandi í nærri tvo áratugi og rak um tíma veitingastað sem sérhæfði sig í norrænum mat á suðurströnd Englands. Í dag á hinn goðsagnakenndi askur Yggdrasils hug hennar allan en hún stofnaði nýverið fyrirtækið Öskuhús og þróar undir merkjum þess matvörur unnar úr aski.

Eiginleikar á við túrmerik

„Það er kannski ekki að undra að askurinn er kallaður lífsins tré enda hægt að nýta í raun alla hluta trésins til matargerðar. Matur og norræn goðafræði hafa lengi verið mín ástríða og ég hef rannsakað askinn heilmikið. Hann inniheldur mörg heilnæm efni og mætti helst líkja honum við túrmerik. Hægt er að leggja laufblöðin í heitt vatn til að gera te, þurrka ræturnar, fræin, laufblöðin og börkinn og nota olíu af trénu. Ég hef prófað að setja fræin í súr og notað eins og súrar gúrkur og notað börkinn til að reykja mat. …