„Ég er ekki hvatamaður þess að hvorki námsmenn eða aðrir sem eru á atvinnuleysisskrá fái fjármagn úr ríkissjóði fyrir að gera ekki neitt.“

Þetta sagði Ásmundur Einar Daðason félagsmálaráðherra í Silfrinu í dag, aðspurður um kröfur námsmanna um að fá atvinnuleysisbætur í sumar.

„Ég hef raunar áhyggjur af því að við séum einhvern veginn alltof mikið, í öllu sem við erum að gera núna – allar kröfur sem koma fram, hvort sem er frá námsmönnum, fyrirtækjum eða öðrum – þær miða rosalega mikið að því að við eigum að slökkva allt og loka öllu. Allir vilji fá fjármagn fyrir að gera ekki neitt,“ sagði ráðherrann.

„Ég held það sé ekki skynsamlegt vegna þess að við erum með tugi þúsunda á atvinnuleysisskrá, og við – því við erum núna að sjá að þetta er langtímaatvinnuleysi, hlutabæturnar að trappast niður – þá þurfum við einmitt að fara að huga að því að koma fólki í virkni. Og inni í hagkerfinu núna höfum við gríðarmikil tækifæri til að gera það, því það er góður slaki, fjárhagsstaðan er góð og það er miklu skynsamlegra að gera það svona, og það á við um námsmennina og atvinnulífið líka.“

Ásmundur Einar sagði mikilvægt að nálgast atvinnuleysisbótakröfur námsmanna með þessum hætti og það hefði þegar gengið ágætlega. „Þetta er svona verkefnið og þess vegna nálgast ég þessar atvinnuleysisbótakröfur námsmanna öðruvísi heldur en þannig að við eigum bara að skaffa þeim framfærslu, við eigum að skaffa þeim vinnu.“