Sonur Jóninnu Mar­grétar Pét­urs­dóttur, kon­unnar sem lést í síð­ustu viku af völdum COVID-19 kór­óna­veirunnar á Land­spít­al­anum, segir mjög erfitt til þess að vita að hún hafi verið ein þegar hún kvaddi þennan heim. Það sé ein birt­ing­ar­mynd þess hvernig veiran herji á sam­fé­lagið, að fólk sé eitt og ein­angrað að takast á við erf­ið­leika. „Mig grunar að fæstir geri sér grein fyrir því,“ segir Þröstur Reyn­is­son. Hann segir móður sína hafa verið afskap­lega vand­aða og góða konu og sinn besta vin. Eig­in­maður Jóninnu og faðir Þrastar liggur mikið veikur af vírusnum á gjör­gæslu en tek­ist hefur að halda honum stöð­ugum síð­ustu daga sem vekur vonir.

Jóninna var 71 árs gömul, búsett í Hvera­gerði, en COVID-19 veiran hefur hitt bæj­ar­fé­lagið afar illa fyrir eins og hefur verið fjallað um í Stund­inni. Jóninna var astma­sjúk­lingur en að sögn Þrastar hafði sjúk­dóm­ur­inn ekki áhrif á dag­legt líf hennar, hún tók sín lyf og lifði eðli­legu og virku lífi. Jóninna lést á Land­spít­al­anum 23. mars síð­ast­lið­inn, fyrst Íslend­inga, eftir að hafa verið flutt þangað mikið veik viku áður, 16. mars síð­ast­lið­inn. Fram að því hafði hún engin ein­kenni sýnt. 

„En hún var ein þegar and­látið bar að garði. Það er mjög erfitt að vita til þess“

Sökum eðlis COVID-19 veirunnar og hversu bráðsmit­andi hún er gátu fáir hitt Jóninnu á meðan hún lá inni á Land­spít­al­anum. Þröstur gat þó hitt móður sína stutt­lega en hann hefur verið í ein­angrun síðan að veik­indin komu upp. „Annars hitti ég hana ekk­ert meir en náði að tala við hana í síma á laug­ar­deg­inum. Aðeins pabbi og elsti bróðir minn fóru og hittu hana og svo ein frænka mín. Mér skilst að hún hafi þó getað heyrt í ansi mörgum í gegnum síma. En hún var ein þegar and­látið bar að garði. Það er mjög erfitt að vita til þess, þetta er nú ein birt­ing­ar­mynd þess hvaða áhrif þessi veira hefur.“

Liggur mikið veikur á gjörgæslu

Eig­in­maður Jóninnu heit­innar er 75 ára gam­all og hefur að sögn Þrastar sonar hans ekki glímt við nein veik­indi fram til þess að hann smit­að­ist af COVID-19 veirunni. Hann hafi hríð­versnað mjög hratt og liggi mikið veikur á Land­spít­al­anum. Þröstur segir þó að tek­ist hafi að halda líðan hans stöðugri síð­ustu daga sem veki vonir um að hann muni ná að kom­ast yfir þann hjalla. 

Þröstur telur að móðir sín hafi vitað að hverju dró í veik­indum sínum. „Já, mér skilst að hún hafi gert sér grein fyrir því, og við vorum held ég öll búin að und­ir­búa okkur fyrir þetta.“

„Almenn­ingur er hins vegar allt of væru­kær og þarf alvar­lega að skoða sín mál“

Starfs­fólk Land­spít­ala stendur sig eins og hetjur í þessum aðstæðum sem nú eru uppi, að mati Þrastar, og nú komi vel í ljós hvers konar fag­fólk við Íslend­ingar eigum. „Almenn­ingur er hins vegar allt of væru­kær og þarf alvar­lega að skoða sín mál þegar kemur að sam­skiptum og for­vörnum.“ Spurður hvort hann hafi þá áhyggjur af því að enn fleiri eigi eftir að verða alvar­lega fyrir barð­inu á veiru­far­aldr­inum svarar Þröstur: „Mikið fleiri.“ Hann brýnir fyrir fólki að veiru­sýk­ingin sé dauð­ans alvara og allir, með engum und­an­tekn­ingum, verði að hlýða fyr­ir­mælum heil­brigð­is­yf­ir­valda, fyrir sig sjálfa og fyrir með­borg­ar­ana. 

Beðinn um að lýsa móður sinni heit­inni svarar Þröstur: „Hún var afskap­lega vönduð og góð kona og minn allra besti vinur.“

Mun allt sitt líf reyna að heiðra ömmu sína

Barna­barn Jóninnu setti inn fal­lega kveðju um ömmu sína á Facebook-síðu hennar fyrir fjórum dögum síðan sem lesa má hér í heild sinni: „Jesús hvað það er erfitt að missa. Amma var mér sem önnur móðir enda tók hún þátt í upp­eldi á mér. Alltaf hægt að treysta á þig og alltaf stóðstu með mér. Við áttum svo margt eftir saman elsku amma en þú áttir að verða partur af öllu því stóra sem ég á eftir. Þú áttir að ganga með mér niður kirkju­gólfið, þú áttir að verða skírn­ar­vottur, þú áttir eftir að sjá fyrstu eign­ina sem við kaupum okkur. Allar úti­leg­urnar, mat­ar­boðin, jóla­und­ir­bún­ing­ur­inn og allt sem við vorum vanar að gera saman. Að vita það að ég heyri aldrei 'nei hæ ástin mín' aftur stingur mig. Þú varst svo fal­leg, svo góð og svo ofboðs­lega traust. Ég mun allt mitt líf reyna að heiðra þig og þú átt alltaf stað í mínu hjarta. Elsku amma ég vona að amma Sigga hafi tekið vel á móti þér og ég sé þig þegar kemur að mér. Lovjú.“

Yfir 1.000 manns hafa nú sýkst af COVID-19 kór­óna­veirunna á Íslandi og 25 manns liggja veikir á sjúkra­húsi af völdum veirunnar. Þar af eru tíu á gjör­gæslu. Hins vegar hefur 135 manns sem fengu veiru­sýk­ing­una nú batnað af henni. Ríflega 9.500 manns eru í sótt­kví og tæp­lega 900 manns í ein­angrun. Tæplega 5.000 manns hafa lokið sótt­kví.