Lögreglan á höfuðborgarsvæðinu telur CBD olíu löglega á Íslandi. Þetta kemur fram í samskiptum embættisins við meðlim CBD samtakanna á Facebook, þar sem spurt var hvort sala á CBD olíu (cannabidiol), sem unnin er úr plöntum af kannabisættinni, sé lögleg.

Halldóra Mogensen, þingmaður Pírata, lagði ásamt fleiri þingmönnum fram tillögu í haust þess efnis að gera sölu á vörum sem innihalda CBD heimila í almennri sölu. Áhöld hafa verið um lögmæti efnisins, en lyfjastofnun hefur veitt heimild fyrir einni vöru sem inniheldur það. CBD er ekki vímugjafi, ólíkt efninu THC sem einnig má finna í kannabisplöntum.

Aðspurð um hvort sala CBD olíu sé lögleg á Íslandi, svaraði lögreglan á höfuðborgarsvæðinu samtökunum að svo væri. „Það er ekki nema von að þú spyrjir,“ segir í svari embættisins. „Það er ekki langt síðan að okkar fólk lagðist í þá vinnu að skoða og greina málefni sem varða CBD olíu í vörum sem eru til í almennri sölu. Án þess að fara í lagalegu flækjuna á bak við þá niðurstöðu þá er svarið já.“

Á vef Lyfjastofnunar kemur fram að flytja megi CBD olíur til landsins, svo framarlega sem kvittun og ávísun læknis er framvísað. Lögreglan á höfuðborgarsvæðinu lítur því efnið ekki sömu augum og til dæmis fíkniefni. „Meðal þeirra atriða sem styðja þá niðurstöðu er að CBD er ekki á bannlista reglugerðar nr. 233/2001 um ávana-fíkniefni og önnur eftirlitsskyld efni,“ segir í svari lögreglunnar.

Samskipti CBD samtakanna og lögreglunnar á höfuðborgarsvæðinuEmbættið lagðist í vinnu við að skoða lögmæti sölu CBD olíu.

Í samskiptum við Stundina staðfestir lögreglan á höfuðborgarsvæðinu að þetta hafi verið svarið sem embættið gaf. „Hér er þó ekki öll sagan sögð, en þótt að CBD sé almennt ekki undir eftirliti lögreglu þá getur það verið álitið lyf og því ekki löglegt til sölu nema að fengnu lyfsöluleyfi,“ segir í svari embættisins. „Að sama skapi getur það flokkast sem fæðubótarefni og því þurft að uppfylla slíkar reglur. Þetta er því frekar flókið mál.“