Sú uppsveifla sem byrjaði sumarið 2010 hefur fært þjóðinni betri lífskjör en nokkru sinni áður. Verg landsframleiðsla á mann hefur frá árinu 2016 verið hærri en hún náði árið 2007 fyrir fjármálaáfallið, en nú er tekið að kólna.
Þetta er meðal þess sem Gylfi Zoega, prófessor í hagfræði, fjallar um í Vísbendingu, sem kom til áskrifenda í dag.
Í ítarlegri grein, sem ber yfirskriftina Kólnun og kjarasamningar, segir hann komin séu fram skýr merki um að tekið sé að kólna í hagkerfinu. „Á þessu ári er búist við 2,4% fækkun ferðamanna bæði vegna minna sætaframboðs og vísbendinga um minni eftirspurn erlendis eftir ferðum til Íslands. Þannig er spáð samdrætti í útfluttri eftirspurn í fyrsta sinn frá því árið 2008. Minni útflutningseftirspurn mun lækka hagvöxt á árinu en Seðlabankinn spáir því að hagvöxtur minnki úr 4,3% árið 2018 í 1,8% árið 2019. Vísbendingar eru um enn meiri fækkun ferðamanan en þeim fækkaði um 5,8% í janúar í samanburði við janúar á síðasta ári skv. nýjum tölum Isavia. Minni hagvöxtur hér á landi hefur áhrif á vinnumarkað. Skráð atvinnuleysi fer vaxandi. Um þriðjungur fyrirtækja vilja fækka starfsfólki meira og meira en helmingi færri fyrirtæki telja sig búa við skort á starfsfólki en árið 2017,“ segir meðal annars í greininni.
Gylfi varar við því að hækka laun of skarpt í ljósi þeirra stöðu sem uppi er um þessar mundir. „Í ljósi þess að mikill kostnaður innlendra fyrirtækja og hátt innlent verðlag er að valda umsnúningi í útflutningsgreinum og minni hagvexti á næstu árum má leiða líkum að því að launahækkanir myndu leiða til annars hvors: samdráttar og minni atvinnu, eða hærra verðlags og lægra gengis, að öðru óbreyttu. Það sem gæti breyst og réttlætt slíkar launahækkanir væri mikill bati í viðskiptakjörum, stóraukin framleiðni eða aukinn áhugi á íslenskum útflutningi óháð verði hans. En fátt bendir til þess að þetta muni gerast,“ segir Gylfi.
Hægt er að gerast áskrifandi að Vísbendingu hér.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir