Nokkur ensk úrvalsdeildarlið eru sögð vera að bera víurnar í Ragnar Sigurðsson, hetju íslenska landsliðsins í leiknum gegn Englandi, samkvæmt breskum fjölmiðlum.
Ragnar var valinn maður leiksins en hann hefur staðið sig gríðarlega vel allt mótið. Ensku meistararnir Leicester og Tottenham Hotspur, sem lenti í þriðja sæti úrvalsdeildarinnar í vetur, hafa sýnt formlegan áhuga á honum og haft samband við umboðsmann hans, að því er Guardian greinir frá. Liverpool og önnur úrvalsdeildarlið eru einnig sögð hafa lýst yfir áhuga á honum.
Þá er sagt að þýsku liðin Schalke og Wolfsburg hafi áhuga á að fá hann í sínar raðir og hafi haft samband við Krasnodar, liðið sem Ragnar spilar með í Rússlandi.
Fjölmiðlar í Englandi greina líka frá áhuga á Jóhanni Berg Guðmundssyni, sem spilar hjá Charlton í ensku annarri deildinni, en ljóst þykir að hann mun yfirgefa herbúðir liðsins í sumar. Hann hefur sjálfur sagt að hann ætli ekki að hugsa um vistaskiptin fyrr en að Evrópumótinu er lokið, en nú greina fjölmiðlar frá áhuga fyrstu deildar liðsins Norwich á honum.
Íslensku landsliðsmennirnir hafa vakið mikla athygli á Evrópumótinu og hefur verið talið að margir þeirra myndu vekja athygli og áhuga ýmissa liða, enda mót eins og þetta einn stærsti sýningargluggi fyrir fótboltamenn.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir