Guðmundur Gunnarsson, fyrrum formaður Rafiðnaðarsambandsins og faðir Bjarkar Guðmundsdóttur söngkonu, segir dóttur sína búa á Íslandi og greiða hér sína skatta.
Þetta kemur fram í Facebook stöðuuppfærslu hans sem birtist fyrr í dag vegna ummæla Jóns Gunnarssonar, þingmanns Sjálfstæðisflokksins og formanns atvinnuveganefndar, um Björk í gærkvöldi. Jón sagðist þar játa að hann skildi ekkert í Björk og velti því fyrir sér hvort hún borgaði skatta á Íslandi.
Guðmundur spyr á móti hvar skattar stóriðjunnar séu og „auðlindagjöld þeirra sem kostuðu Jón á þing?"
Gagnrýni Jóns á Björk kom í kjölfar þess að hún kallaði Bjarna Benediktsson, fjármála- og efnahagsráðherra, og Sigmund Davíð Gunnlaugsson forsætisráðherra, sveitalubba í viðtali við Sky-sjónvarpsstöðina. Sagði Jón m.a. að Björk væri „frekar dauf til augnanna á bak við grímuna“.
Hann hefur verið harðlega gagnrýndur fyrir þau ummæli á samfélagsmiðlum í dag. Dagur B. Eggertsson, borgarstjóri í Reykjavík sagði m.a. að annað hvort myndi Jón biðjast afsökunar á „þessum fáránlegu ummælum“ um Björk og draga þau til baka eða hann sæti uppi með ævivarandi skömm.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir