Sigmundur hefur ekki mætt í neina atkvæðagreiðslu á haustþingi

Sig­mundur Davíð Gunn­laugs­son, fyrr­ver­andi for­sæt­is­ráð­herra og for­maður Fram­sókn­ar­flokks­ins, hefur ekki mætt í eina ein­ustu atkvæða­greiðslu á haust­þingi. Þetta sýna upp­lýs­ingar á vef þings­ins. 

Sig­mundur situr ekki í neinni fasta­nefnd á vegum Alþingis og hefur því ekki þurft að mæta á nefnd­ar­fundi eða sinna nefnd­ar­störfum af neinu tagi. Engu að síður hefur hann þegið fullt þing­far­ar­kaup auk 50 pró­senta álags sem for­maður stjórn­mála­flokks. Jafn­framt átti hann rétt á bið­launum sem fyrr­ver­andi ráð­herra í sex mán­uði eftir að hann sagði af sér. Stundin hefur sent for­sæt­is­ráðu­neyt­inu fyr­ir­spurn um hvort Sig­mundur hafi þegið þau.

Frétta­stofa RÚV fjall­aði um mæt­ingu þing­manna í gær og fékk skýr­ingar frá Sigmundi á fjar­veru hans. „Sig­mundur seg­ist í skila­boðum til frétta­manns hafa verið nokkuð upp­tek­inn við að verj­ast ítrek­uðum til­raunum til að fella hann sem for­mann flokks­ins,“ segir í frétt RÚV. 

Guð­mundur Stein­gríms­son, þing­maður Bjartrar fram­tíðar, gerði mæt­ingu Sig­mundar Davíðs að umtals­efni á Alþingi um dag­inn. „Það er einn óbreyttur þing­maður á meðal okkar sem situr ekki í neinni þing­nefnd. Það er hátt­virtur þing­maður Sig­mundur Davíð Gunn­laugs­son, sem var áður for­sæt­is­ráð­herra en er núna þing­maður. Hann er á fullu þing­far­ar­kaupi og í raun og veru með 50% álagi vegna flokks­for­mennsku og hann er með aðstoð­ar­mann líka. Eru for­dæmi fyrir því að óbreyttir þing­menn sitji ekki í neinni þing­nefnd og taki þar með ekki þátt í nefnda­störfum svo ekki sé talað um að mæta ekki í atkvæða­greiðslur og taka ekki til máls í pontu Alþingis?“ spurði hann.

Einar K. Guð­finns­son, for­seti Alþingis, sagð­ist ekki treysta sér til að svara því hvort sögu­leg for­dæmi væru fyrir því að ein­stakir þing­menn hefðu ekki setið í þing­nefndum um lengri eða skemmri tíma. „Þetta er mál sem er fyrst og fremst í höndum þeirra þing­flokka sem í hlut eiga. Það eru, eins og við vitum, þing­flokk­arnir sem taka ákvörðun um skipan í nefndir í krafti þess þing­styrks sem við­kom­andi þing­flokkar hafa,“ sagði þing­for­seti og bætti við: „Það hefur aldrei verið svo þannig að for­seta sé kunn­ugt um að for­seti hafi haft afskipti af slíku enda mundi slíkt vænt­an­lega vera talin óeðli­leg afskipti af hálfu for­seta varð­andi þá skipan. Forseti treystir sér hins vegar ekki til þess að svara því hvort þau dæmi sem hátti­vrtur þing­maður vísar til hafi þekkst í for­tíð­inni.“

Samkvæmt sam­an­tekt RÚV hafa Björt Ólafs­dóttir úr Bjartri fram­tíð, Hösk­uldur Þór­halls­son úr Fram­sókn­ar­flokknum og Ögmundur Jónasson úr Vinstri grænum mætt verst í atkvæða­greiðslur á eftir Sigmundi Davíð.

Með bestu mæt­ing­una eru Steinunn Þóra Árna­dóttir, þing­kona Vinstri grænna, Willum Þór Þórsson, þing­maður Fram­sókn­ar­flokkns­ins, Ásta Guðrún Helga­dóttir Pírati, Þórunn Egils­dóttir úr Framsókn og Vil­hjálmur Bjarna­son úr Sjálf­stæð­is­flokknum.