Ríkislögreglustjóri boðar vopnaða sérsveit á útihátíðir og segir að „engin nýlunda“ sé í vopnaburðinum

Íslenskur almenn­ingur þarf að búa við breyttan veru­leika, þar sem vopn­aðir sér­sveit­ar­menn verða sýni­legir á úti­há­tíðum, en það er engin stefnu­breyt­ing, að sögn Haraldar Johann­es­sen rík­is­lög­reglu­stjóra.

Vopnuð sér­sveit verður á meðal mann­fjöld­ans í hátíð­ar­höld­unum á þjóð­há­tíð­ar­dag­inn 17. júní, og svo á tón­list­ar­há­tíð­inni Secret Solstice, auk þess sem nú er verið að skoða hvort sér­sveitin mæti á þjóð­há­tíð í Vest­manna­eyjum.

Þótt vopnuð lög­regla hafi ekki verið sýni­leg á manna­mótum á Íslandi fram að þessu, segir rík­is­lög­reglust­sjóri í sam­tali við Rúv að það sé „engin stefnu­breyt­ing“. „Já. Við þurfum að átta okkur á því að sér­sveit­ar­menn eru vopn­aðir. Og þeir eru orðnir mjög sýni­legir í íslensku sam­fé­lagi. Þannig að almenn­ingur er far­inn að sjá vopn­aða lög­reglu­menn mjög mikið hér á höf­uð­borg­ar­svæð­inu. Þannig að það er engin nýlunda, það er engin stefnu­breyt­ing hvað það varðar. En almenn­ingur á von á að sjá vopn­aða sér­sveit­ar­menn á þessum stóru úti­há­tíðum,“ segir Haraldur.

Sér­sveit­ar­maðurÍ mið­borg Reykja­víkur.

Mynd: Pressphotos

Að sögn Haraldar er ekki verið að auka vopna­burð. „Við erum ekki að auka vopna­burð. Það sem við erum að gera er að við erum að gera hina vopn­uðu lög­reglu í land­inu, sér­sveit rík­is­lög­reglu­stjóra, sem dags­dag­lega er undir vopnum, meira sýni­lega á stórum sam­komum. Samkomum þar sem tugir þús­unda koma saman á ein­hverri úti­há­tíð­inni.“

Haraldur segir að hver sek­únda skipti máli. Það sem hann ótt­ast eru hryðju­verka­árásir ísla­mista, sam­bæri­legar þeim sem urðu nýverið í London og Manchester.

Nýtt þjóðar­ör­ygg­is­ráð, sem stýrt er af Bjarna Bene­dikts­syni for­sæt­is­ráð­herra, fund­aði á „öruggum stað“ á Kefla­vík­ur­flug­velli í gær. Þar var rætt um auk­inn við­búnað og vopna­burð lög­reglu.