Þau hjá breska útvarpinu BBC eru með athyglisverða reiknivél á vefsíðunni sinni. Þar getur fólk slegið inn árslaununum sínum og ættlandi og síðan fengið upp gefið hvernig helstu fótboltamenn heimsins hafa það í samburði við almúgann.
Þar eru nefndir til sögu Neymar, Messi, Cristiano Ronaldo og nokkrir í viðbót.
Þar á meðal Gylfi Sigurðsson sem er nýgenginn til liðs við Everton.
Ef við reiknum íslenskum mánaðarlaunum fyrir skatta upp á 420 þúsund, þá gera það árslaun upp á 5.040.000 krónur.
Og þá kemur í ljós - segir vélin - að Gylfi Sigurðsson er 42 mínútur að vinna sér inn fyrir vikulaununum þínum.
Og það myndi taka Íslending með 420.000 á mánuði 238 ár að vinna sér inn árslaun Gylfa.
Það fylgir sögunni á vefsíðu BBC að Gylfi hafi 95 sinnum hærri laun en fyrirliði enska kvennalandsliðsins í fótbolta.
Gylfi á sem sagt vel fyrir salti í grautinn.
Hann er samt ekki einu sinni hálfdrættingur á við þá sem best hafa launin í fótboltanum.
Launahæstu fótboltamenn heims, Neymar og Cristiano Ronaldo, væru nákvæmlega sjö mínútur að vinna sér inn árslaun Íslendings með 420 á mánuði.
Þeir gætu til dæmis hlustað í rólegheitum á Stairway to Heaven með Led Zeppelin og þegar hið um það bil 7 mínútna lag væri búið, þá væru þeir komnir með það í vasann sem Íslendingurinn vinnur sér inn á viku.
Og til að vinna sér inn árslaun Neymars hefði Íslendingurinn þurft að hefja störf árið 468 og væri þá í árslok búinn að ná sömu upphæð og Neymar fær á þessu ári.
Og loks: Brasilíumaðurinn Neymar hefur 1.218 sinnum hærri laun en besta fótboltakona Brasilíu, það er að segja hún Martha.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir