Þessi færsla er meira en 6 ára gömul.
Súkkulaði-avókadóterta
Ég er hluti af vinkonuhóp sem kallast Háværurnar. Nafnið er auðskýrt - fimm blaðrandi söngkonur sem eiga það til að tala hvor aðra í kaf. Við höfum verið vinkonur í rúm tíu ár og í dag erum við dreifðar víðs vegar um Evrópu. Þegar við erum allar á Íslandi höldum við lítið ( en hávært) matarboð. Verkaskiptingin er alltaf sú sama: Tvær sjá um matinn, ein um salatið og ég sé um eftirréttinn. Sú fimmta kemur með góða skapið ( og stundum gos). Núna um jólin langaði mig að búa til nýjan eftirrétt og eftir að hafa áður gert nokkrar tilraunir með avókadó og súkkulaði þá datt mér í hug að avókadó-terta gæti verið málið. Hún er með engum hvítum sykri, auðvelt að gera glúteinfría og auðvitað vegan. Svona næstum því hollur eftirréttur.
Háværutertan
Botninn:
2/3 bolli haframjöl*
2/3 bolli möndlur
2,5 dl döðlur
1 bolli kókosflögur
1/4 tsk salt
2 msk kókosolía
1 msk hlynsýróp
*til að hafa tertuna glútenfría er hægt að skipta höfrunum út fyrir aðrar hnetur, t.d. valhnetur eða kasjúhnetur.
Aðferð:
Ofninn hitaður í 180°C. Haframjöli, kókos og möndlum er blandað saman í matvinnsluvél. Döðlunum bætt út í, einni í einu. Að lokum er saltinu, kókosolíunni og hlynsýrópinu bætt við. Öllu blandað vel saman og fært yfir í lítið kökuform. Blöndunni þrýst þétt niður í botninn og örlítið upp meðfram hliðnum þannig að botninn verði eins og grunn skál.
Því næst er stungið þvert yfir botninn með gaffli til að tertan blási ekki upp. Bakað í miðjum ofni í 10-15 mínútur eða þar til botninn hefur tekið gullinbrúnan lit. Botninn látinn kólna alveg áður en fyllingunni er smurt ofan á.
Fylling:
2 þroskuð avókadó
200 g suðusúkkulaði
2 msk af stórri kókosmjólk úr dós**
1 tsk hlynsíróp
1 tsk vanilludropar
Saltflögur
** ég nota aðeins þykka partinn af kókosmjólkinni og mér finnst best að geyma dósina í ísskáp yfir nótt eða frysta dósina í styttri tíma. Hægt er að nýta afganginn af þykku kókosmjólkinni til að skreyta tertuna. Kókosmjólkin er létt-þeytt og sprautað ofan á tertuna með sprautupoka og stjörnustút.
Aðferð:
Suðusúkkulaðið brætt yfir vatnsbaði og leyft að kólna lítillega áður því er bætt við avókadó-blönduna. Avókadóunum, kókosmjólkinni, hlynsýrópinu og vanilludropunum blandað saman í matvinnsluvél. Súkkulaðinu blandað saman við þar til blandan er slétt og kekkjalaus. Blöndunni hellt yfir kældan botninn. Nokkrum saltflögum stráð yfir og tertan skreytt með kókos-„rjóma“
Tertan geymd í kæli þar til hún er borin fram.
Fleiri færslur frá höfundi
Jackfruit-vængir
Nú hlýtur hverjum þeim sem les þetta blogg að vera ljóst að ég elska jackfruit. Allavega er þetta þriðja uppskriftin hér sem byggð er á þessum undraávexti. Í þetta skipti gerði ég jackfruit-vængi eða KFJ (Kentucky Fried Jackfruit). Það er viðeigandi að kalla þessa uppskrift KFJ þar sem að ég prófaði að nota kryddblöndu sem á að vera „nákvæm“ eftirlíking...
Sætkartöflu Wellington
Ég er mjög spennt fyrir jólamatnum. Síðustu tvö ár hef ég gert grænmetis Wellington, sem er dýrindis grænmetisfylling bökuð í smjördeigi. Ég hlakka alltaf til að borða Wellington og þessi réttur er yfirleitt sá sem ég geri til hátíðarbrigða. Wellington passar líka ótrúlega vel með hefðbundnu jólameðlæti. Fyrsta uppskriftin sem ég prófaði var frá Jamie Oliver. Sú uppskrift er með...
Eggaldinsúpa
Ég elska súpur. Þær geta verið svo dásamlega einfaldar og margbreytilegar. Það kann að hljóma undarlega en súpur er uppáhalds maturinn minn. Ég segi súpur af því að það er ekki nein ein súpa sem númer eitt. Ég geri mismunandi súpur fyrir mismunandi tilefni. Sterka og iljandi sætkartöflusúpu þegar kalt er úti, með extra skammti af engiferi þegar ég finn...
Blómkálsbaka
Upp á síðkastið hef ég mikið verið að skoða uppskriftir sem eru hollar og næringarríkar en ekki kolvetnisríkar. Það getur verið ögn snúið, þar sem að grjón, pasta eða kartöflur er yfirleitt miðja máltíðanna minna. En nýlega prófaði ég að gera blómkáls 'hrísgrjón' og þau heppnuðust mjög vel. Einnig keypti ég mér grænmetisskera sem gerir ræmur þannig að hægt er...
Athugasemdir