Ísland verður æ vinsælla meðal erlendra ferðamanna eins og mikið hefur verið rætt um. Með þessum aukna fjölda ferðafólks hefur landslag verslunar og þjónustu breyst mikið undanfarin ár í miðbæ Reykjavíkur; stærsta ferðamannastað landsins. Slíkt á auðvitað einnig við um fleiri ferðamannastaði.
Með hverju hótelinu sem sprettur við Laugaveg verða til aukin tækifæri fyrir veitingastaði, verslanir og þjónustu í næsta nágrenni. Út um gluggann á ritstjórn Kjarnans fylgdist starfsfólkið hér til dæmis með uppbyggingu ofarlega á Laugaveginum, þar sem nýtt hótel glæddi nærumhverfið nýju lífi.
Það má lengi ræða og gagnrýna einstaka skipulagsákvarðanir og hvernig íslenska ríkið á að regluvæða stærri ferðaþjónustumarkað. Það má hins vegar ekki gleyma því sem ekki verður auðveldlega metið til fjár: menninguna.
Um helgina opnar götumatarmarkaðurinn Krás í Fógetagarði og er þar orðið um árlegan viðburð að ræða. Þar munu íslenskir veitingamenn bjóða upp á götumat í takti við matseðla sína allar helgar fram til 20. ágúst. Á slíkum götumarkaði er matarmenningu Íslendinga gerð góð skil. Ráðgert er að annar matarmarkaður muni opna á Hlemmtorgi í skjóli frá veðri og vindum. Þá eru einnig uppi hugmyndir um að opna veitinga- og matarmarkað í Holtagörðum.
Slíkum menningarsuðupottum er vissulega tilefni til að fagna og njóta í samfélagi með þeim ferðamönnum sem hingað hafa ferðast langar leiðir til að kynnast Íslandi og Íslendingum.
Verði ykkur að góðu!
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir