Starfsmaður fjármálaráðuneytisins sem situr í fjármálaeftirlitsnefnd Seðlabanka Íslands sem pólitískt skipaður nefndarmaður hefur vikið sæti við meðferð nefndarinnar á Íslandsbankamálinu svokallaða. Þetta kemur fram í tölvupósti frá fjármálaráðuneytinu til Heimildarinnar.
Tölvupósturinn frá ráðuneytinu er viðbragð við umfjöllun blaðsins um átök um stjórnskipulag Seðlabanka Íslands sem nú eiga sér stað innan stjórnkerfisins og í stjórnmálum á Íslandi sem birt var fyrir helgi. Einn helsti ásteytingarsteinninn í þeirri umræðu er fjármálaeftirlitsnefndin og hvort seðlabankastjóri eigi að sitja í henni sem formaður og eins hvort halda eigi því fyrirkomulagi að skipa ytri nefndarmenn í hana.
Eina fastanefndin sem er pólitískt skipuð að meirihluta
Starfsmaðurinn heitir Guðrún Þorleifsdóttir og er skrifstofustjóri fjármálamarkaða í ráðuneytinu. Hún var skipuð í fjármálaeftirlitsnefnd af Bjarna Benediktssyni fjármálaráðherra en ráðuneyti hans ber ábyrgð á hlutabréfum íslenska ríkisins í fjármálafyrirtækjum, sem og á sölumeðferð þeirra.
Sérstaða fjármálaeftirlitsefndar meðal hinna þriggja fastanefnda Seðlabanka Íslands er að fjármálaráðherra skipar meirihluti nefndarmanna.
Í tölvupóstinum frá fjármálaráðuneytinu kemur fram að Guðrún hafi getað verið skipuð í fjármálaeftirlitsnefnd þar sem hún hafi ekki beina aðkomu að eignarhaldi og sölumeðferð hlutabréfa íslenska ríkisins í fjármálafyrirtækjum. Enn fremur segir að talið hafi verið æskilegt að starfsmaður fjármálaráðuneytisins sæti í nefndinni. „Ráðuneytið vill af því tilefni árétta að við skipan í fjármálaeftirlitsnefnd er gætt að ákvæðum um að nefndarmenn megi ekki sinna störfum utan bankans sem geta verið til þess fallin að draga óhlutdrægni þeirra í efa. Í ljósi þess að ráðherra er með lögum falin ábyrgð á málaflokknum sem hér um ræðir hefur verið talið æskilegt að starfsmaður ráðuneytisins sitji í nefndinni. Það er á þeim grundvelli sem Guðrún Þorleifsdóttir var skipuð, en hún hefur í starfi sínu ekki aðkomu að meðferð eignarhalds ríkisins á fjármálafyrirtækjum eða sölumeðferð fjármálafyrirtækja,“ segir fjármálaráðuneytið.
Nefndin metur Íslandsbankamálið án Guðrúnar
Fjármálaeftirlitsnefnd er æðsta stjórnvald fjármálaeftirlits á Íslandi. Nefndin hefur nú til meðferðar niðurstöðurnar úr rannsókn fjármálaeftilits Seðlabanka Íslands á Íslandsbanka vegna útboðs bankans á tæplega fjórðungs hlutar íslenska ríkisins í bankanum. Fjármálaeftirlitsnefnd mun líklega leggja sekt á Íslandsbanka vegna aðkomu hans að sölunni á hlutabréfum ríkisins í bankanum og eins ákveða hversu mikið verður greint frá málavöxtum rannsóknarinnar opinberlega. Bankinn hefur hingað til ekki viljað gefa upphæð sektarinnar upp. „Við höfum ekki gefið það upp. [...] Við erum bara ennþá að klára að afhenda gögn og bregðast við áliti eftirlitsins, koma að andmælum um alla þessa þætti,“ sagði Birna Einarsdóttir, forstjóri Íslandsbanka, á fundi um ársuppgjör bankans með blaðamönnum á föstudaginn.
„Að hennar sögn mat hún aðstæður þannig að hæfi hennar yrði ekki hafið yfir vafa m.t.t. aðkomu ráðuneytisins að málinu, en málið hefði mikla sérstöðu.“
Það sem til rannsóknar er í Íslandsbankamálinu er meðal annars skilgreining bankans á fagfjárfestum í útboðinu á hlutabréfum ríkisins sem viðskipti starfsmanna hans sjálfs með bréfin, líkt og Heimildin greindi frá fyrir skömmu.
Samkvæmt tölvupósti fjármálaráðuneytisins þá hafa umræðurnar í fjármálaeftirlitsnefnd um Íslandsbankamálið hins vegar farið fram án þátttöku þessa starfsmanns ráðuneytisins. „Við þetta er að bæta að nefndarmenn meta hæfi sitt í hverju máli. Guðrún hefur upplýst ráðuneytið um að hún hafi ekki talið sig hæfa til að taka þátt í ákvörðunum í málum vegna sölumeðferðar á Íslandsbanka og því vikið sæti við meðferð nefndarinnar á málum tengdum sölumeðferðinni. Af því leiðir að hún hefur ekki getað haft áhrif á ákvarðanir nefndarinnar í þeim málum.“
Þegar ráðuneytið er spurt nánar að því hvað það er nákvæmlega sem gerir það að verkum að Guðrún telji sig vera vanhæfa í Íslandsbankamálinu segir í svari þess: „Að hennar sögn mat hún aðstæður þannig að hæfi hennar yrði ekki hafið yfir vafa m.t.t. aðkomu ráðuneytisins að málinu, en málið hefði mikla sérstöðu.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Seðlabanki Íslands og Ásgeir Jónsson
Mælt með að frumvarp um Seðlabankann verði samþykkt en að valdreifing verði tryggð
Þingmaður gagnrýnir að Bjarni skipi meirihluta fjármálaeftirlitsnefndar: „Galið fyrirkomulag“
Forsætisráðherra vill áfram skipa pólitískt í æðsta stjórnvald fjármálaeftirlits
Átökin um völd Ásgeirs
14 mín. lestur
Athugasemdir