Sjóðstýringarfyrirtækið Och-Ziff Capital Management hefur verið í miklum vanda að undanförnu þar sem mikið fjármagn hefur farið úr stýringu hjá fyrirtækinu.
Fjárfestar flýja fyrirtækið
Eignir fyrirtækisins í stýringu nema nú um 32 milljörðum Bandaríkjadala, um 3.400 milljörðum króna, en þær hafa minnkað um 22 prósent á aðeins einu ári, samkvæmt uppgjöri félagsins frá því í gær, vegna þess að fjárfestar hafa tekið fjármagn úr stýringu hjá fyrirtækinu.
Sérstaklega hefur staða fyrirtækisins versnað á fyrstu mánuðum þessa árs en eignir í stýringu hafa minnkað um 5,9 milljarða Bandaríkjadala á þessu ári, samkvæmt tilkynningu fyrirtækisins.
Keypti í Arion banka
Á síðustu mánuðum hefur þetta fyrirtæki verið töluvert í umræðunni hér á landi en tilkynnt var um kaup dótturfélags þess, Sculptor Investments s.a.r.l. á 6,6 prósenta hlut í Arion banka í mars síðastliðnum. Fyrirtækið er meðal hluthafa í Kaupþingi, eftir að hafa átt kröfur í slitabú bankans.
Kaupskil ehf., félagi í eigu Kaupþings, á 57,9 prósent hlut í Arion banka, íslenska ríkið 13 prósent, vogunarsjóður í eigu Taconic Capital Advisors 9,9 prósent, Attestor Capital LLP 9,9 prósent og Goldman Sachs 2,6 prósent.
Í ruslflokk
Ekki er nóg með að rekstur Och Ziff hafi gengið mjög illa að undanförnu, og veikst verulega vegna vantrausts fjárfesta á fyrirtækinu, þá hafa lánshæfismatsfyrirtæki staðfest brestina hjá því. Daginn eftir að tilkynnt var um kaup þess á hlut í Arion banka, þá var lánshæfiseinkunn fyrirtækisins færð niður í ruslflokk af Standard & Poor´s.
Hinn 29. september í fyrra var fyrirtækið sektað um 213 milljónir Bandaríkjadala, eða um 25 milljarða króna, eftir að upp komst um stórfelld lögbrot fyrirtækisins í Afríku. Fyrirtækið mútaði embættismönnum til að hagnast sem mest á stöðutökum sínum, meðal annars í Líbíu, Níger og Kongó. Það var dómsmálaráðuneyti Bandaríkjanna sem lagði sektina á fyrirtækið og sagði ákvörðunina marka tímamót. Bandaríska alríkislögreglan FBI er enn að rannsaka hluta þessara glæpa, og ýmsar hliðar þeirra, ef marka má það sem fram kemur í yfirlýsingunni frá því í september.

Fjármálaeftirlitið (FME) er ennþá með þessa eignarhaldsbreytingu á Arion banka til skoðunar, þar sem vogunarsjóðahópurinn fyrrnefndi breytti eignarhaldi sínu úr óbeinu eignarhaldi í beint. Meðal þess sem FME horfir til er hvort þessir teljist hæfir til að vera virkir eigendur.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.











































Athugasemdir