Guttormur Þorsteinsson, formaður Samtaka hernaðarandstæðinga, segir áhyggjuefni að öfl sem daðri við verstu birtingarmyndir kynþáttahaturs og útlendingaandúðar skuli óáreitt fá að skipuleggja námskeið á hóteli í miðri Reykjavík með áherslu á vopnaburð og hermennsku.
Stundin greindi frá því í dag að öryggis- og herskólinn European Security Academy Iceland hefði boðað til kynningarfundar um námskeið í vopnaburði, öryggisgæslu og skyldum verkefnum í Reykjavík. Rætt var við þátttakendur sem vilja nýta sér námskeiðið til að verjast innflytjendum sem koma til Íslands. „Ef þetta heldur svona áfram í Evrópu þá endar þetta með skotvopnum. Því miður,“ sagði einn af viðmælendum Stundarinnar.
Samtök hernaðarandstæðinga hafa fordæmt viðburðinn á Facebook. Guttormur bendir á að í síðasta mánuði hafi öfgamaður og útlendingahatari framið hryðjuverk á Nýja-Sjálandi þar sem fimmtíu manns voru myrtir. „Glæpur þessi hefur orðið mörgum íhugunarefni, enda hafði Nýja-Sjáland til þessa verið talið friðsælt og ólíklegur vettvangur slíkra voðaverka. Viðbrögð samfélagsins hafa falið í sér eindregna höfnun á ofbeldi og hatri,“ segir hann og bætir því við að fyrirtækið sem heldur námskeiðið hafi meðal annars þjálfað öfgahægrihópa í Úkraínu. „Við hvetjum stjórnendur hótelsins til að endurskoða þá ákvörðun að heimila afnot af sölum sínum fyrir slíka starfsemi,“ segir hann.
Kynþáttahatur
Grískur maður „númer tvö“ hjá íslenskum nýnasistum
„Nýnasistar eru alltaf hættulegir fólki sem er ekki hvítt á hörund“
Almannahagsmunir krefjast umfjöllunar um rasista og öfgahópa
Íslenskir nýnasistar lokka „stráka sem eru í sigtinu“ í dulkóðaða netspjallhópa
Nýnasistasíðan hýst af huldufélagi á Klapparstíg í eigu skattaskjólsfélags
Athugasemdir