Ungar hagfræðimenntaðar konur fullyrða í grein sem birtist í Kjarnanum í dag að verkfallsboðun dagsins sé „sérstaklega til höfuðs verkakvenna“ og harma að alþjóðlegur baráttudagur kvenna sé haldinn hátíðlegur „í skugga verkfalla“. Sem kunnugt er er það Efling stéttarfélag, sem samanstendur að miklu leyti af verkakonum, sem boðar til verkfallsins.
Greinin hefur vakið nokkra athygli á samfélagsmiðlum, en höfundar sitja í stjórn félags sem er kallað Hagsmunafélag kvenna í hagfræði.
Í pistlinum er vitnað í hagtölur, svo sem um landsframleiðslu á mann og gini-stuðulinn um tekjujöfnuð, og fullyrt að „íslenskar konur og þjóðin öll [búi] við afburða lífskjör sem við getum verið stolt af“. Í greininni er talið upp hversu vel Ísland og íslenskar konur standi á alþjóðavísu að því er varðar jöfnuð og hagsæld.
Í lok greinar birtir félagið hugvekju til kvenna. Þar kemur fram að félagið telji að efnahagslegar staðreyndir hafi verið dregnar í efa, hafi þær yfir höfuð verið dregnar fram í kjarabaráttunni.
„Verkfallsboðun dagsins í dag er sérstaklega til höfuðs verkakvenna. Konur sinna bæði mikilvægum og fjölbreyttum störfum í íslensku samfélagi og eru í meirihluta þeirra sem sinna fjármálaþjónustu, fræðslustarfsemi, heilbrigðisþjónustu, svo dæmi séu tekin, ásamt því að vera um helmingur þeirra sem starfa innan ferðaþjónustunnar,“ skrifa þær. „Standa þarf vörð um þessi störf og efla kjör þeirra sem þeim sinna, ekki síður en annarra. Það verður þó ekki gert með því að líta framhjá efnahagslegum veruleika í yfirstandandi kjaraviðræðum.“
Staðreyndirnar sem félagið teflir fram eru að við Íslendingar búum við afburða lífskjör en á sama tíma sé minna svigrúm, í núverandi efnahagslegri stöðu, til launahækkana. Varar félagið við því að gengið verði of langt í kjaraviðræðum, því afleiðingin verði óstöðugleiki sem bitni mest á þeim lægst settu.
Konur víða um heim taka þátt í verkföllum í dag í tilefni alþjóðlegs baráttudags kvenna. Þar má nefna lönd eins og Argentínu, Spán, Frakkland, Grikkland, Þýskaland, Sviss og Írland.
Athugasemdir