Katrín Jak­obs­dóttir hefur safnað rúmum 24 millj­ónum króna í kosn­inga­bar­áttu sinni í fram­boði til for­seta Íslands. Ríflega 600 ein­stak­lingar hafa styrkt fram­boð hennar með beinum fram­lögum og 15 lög­að­ilar hafa veitt styrki. Um 20 fyr­ir­tæki hafa styrkt fram­boðið. „En við erum að gera ráð fyrir því að þetta muni kosta meira en þetta, á bil­inu, ég gæti trúað, 40 millj­ónir,“ sagði Katrín í kapp­ræðum Heim­ild­ar­innar sem fram fóru í Tjarn­ar­bíói í gær­kvöldi. 

Eftir líf­legar kapp­ræður lauk umræð­unum á spurn­ingum til fram­bjóð­enda um kostnað við kosn­inga­bar­átt­una hingað til og hvað þau áætla að heild­ar­kostn­aður verði. Framboð Katrínar er kostn­að­ar­sam­ast, um helm­ingi dýr­ara en næstu fram­boð þar á eftir. Halla Hrund Loga­dóttir, Halla Tóm­as­dóttir og Baldur Þór­halls­son gera ráð fyrir að kosn­inga­bar­átta þeirra muni kosta um 20 millj­ónir króna. 

„Þetta eru hátt í 20 millj­ónir, 70 pró­sent frá ein­stak­lingum og restin frá fyr­ir­tækjum eða öðrum aðilum,“ sagði Halla Hrund. Halla Tóm­as­dóttir segir kostnað við hennar fram­boð vera að nálg­ast 20 millj­ónir. „Ég þekki ekki nið­ur­brotið alveg á fram­lögum en ætli við séum ekki að borga helm­ing­inn sjálf og fá helm­ing­inn í fram­lögum frá vinum og vanda­mönnum, mest í litlum fram­lögum.“

Framboð Baldurs hefur kostað 12,4 millj­ónir hingað til en hann áætlar að það muni kosta um 20 millj­ónir. „Þetta eru mest stuðn­ings­menn sem eru að styðja okkur með litlum fram­lögum. Meðal fram­lög í minn kosn­inga­sjóð eru 5.000 krónur.“

Arnar Þór mun borga úr eigin vasa það sem upp á vantar og Jón Gnarr með bola- og hattasölu

Kostn­aður við fram­boð Arnars Þórs Jóns­sonar og Jóns Gnarr er aðeins lægri. Arnar Þór telur að kostn­að­ur­inn nemi um tíu millj­ónum. „Ég vil segja þó að skoð­ana­kann­anir hafa valdið því að stuðn­ings­menn hafa verið feimnir við að styðja menn, þeir hafa talið fram að þessu að það sé á bratt­ann að sækja hjá mér þó ég sé í bull­andi sókn núna. En ég geri ráð fyrir að borga þetta þá sem upp á vantar bara sjálfur. En ég er í sókn og ég borga það sem þarf til að kynna mig.“

Framboð Jóns hefur kostað um sjö millj­ónir króna. „Það eru mest fram­lög frá ein­stak­lingum. Ég veit ekki hversu margir ein­stak­lingar það eru, upp­hæðir mis­jafnar, en engin hærri en 400 hund­ruð þús­und. Svo eru ein­hver fyr­ir­tæki, hver þau eru, hvað þau eru mörg, ég er ekki klár á því, en þau eru ekki svaka­lega mörg. Svo höfum við fjár­magnað okkur með bola og hatta­sölu.“

Samtals nemur kostn­aður fram­bjóð­end­anna sex sem tóku þátt í kapp­ræð­unum í kvöld um 117 millj­ónum króna. Síð­ast þeg­ar sitj­andi for­seti var ekki í fram­boði náðu fjór­ir fram­bjóð­end­ur að á bil­inu 13,7 til 39,1 pró­sent fylgi. Þau eyddu til þess 109 millj­ón­um króna á nú­virði. Þá eyddi Davíðs Oddsson mestu, alls sam­tals tæp­lega 28 millj­ónum króna. Guðni Th. Jóhann­es­son, sem var kjör­inn for­seti, eyddi alls um 25 millj­­ónum króna í sitt fram­­boð á þávirði. Kostn­aður við fram­boð Höllu Tóm­as­dóttur nam um níu millj­ónum króna og er fram­boð hennar nú mun kostn­að­ar­sam­ara. Andri Snær Magnason eyddi um 15 millj­ónum króna í sína bar­áttu. Aðrir fram­bjóð­endur ráku mun ódýr­ari kosn­inga­bar­áttu sem kost­aði ein­ungis nokkur hund­ruð þús­und hver.

Hér má nálg­ast kapp­ræður gær­kvölds­ins; fyrstu 30 mín­útur streym­is­ins eru öllum aðgengi­legar en áskrif­endur geta horft á kapp­ræð­urnar í heild sinni: