Steinunn Ólína segist ekki bjóða sig fram gegn Katrínu vegna persónulegrar óvildar

Steinunn Ólína Þor­steins­dóttir, sagð­ist í nýjasta þætti Pressu, ekki vera bjóða sig fram vegna per­sónu­legrar óvildar í garð Katrínu Jak­obs­dóttur.

Á meðan Katrín lá undir feldi um vænt­an­legt for­seta­fram­boð, birti Steinunn Ólína færslu á Facebook-síðu sinni þar sem hún sagð­ist ekki treysta Katrínu í emb­ætti for­seta Íslands, að feng­inni reynslu. Í færsl­unni lof­aði Steinunn að hún myndi bjóða sig fram gegn Katrínu, ákveði hún fari hún fram.

 „Mér fynd­ist það bera vott um oflæti og að auki fynd­ist mér hún með því sýna þingi, þjóð og öðrum fram­bjóð­endum óvirð­ingu og það get ég ekki sætt mig við.“

4. apríl, degi áður en Katrín Jak­obs­dóttir til­kynnti um fram­boð sitt, birti Steinunn Ólína ávarp á Facebook-síðu sinni þar hún til­kynnti um fram­boð sitt. Athygli vakti að í ávarp­inu var hvergi minnst á Katrínu. 

Spurð nánar út í for­send­urnar að baki fram­boði sínu og gagn­rýni hennar gagn­vart Katrínu seg­ist Steinunn Ólína ekki hafa verið gagn­rýnin á Katrínu sem ein­stak­ling. Hins vegar hafi hún verið gagn­rýnin á rík­is­stjórn hennar. 

„Það er eins og það sé ein­hver skömm af því að fylgj­ast með því sem ger­ist í sínu landi og skrifa um það. Ég hafna því. Það er bara hluti af því að vera þjóð­fé­lags­þegn að fylgj­ast með því sem fer fram og það vill svo til að hún var for­sæt­is­ráð­herra í þess­ari rík­is­stjórn sem ný, er nú breytt. En þetta er ekki vit­und per­sónu­legt,“ sagði Steinunn Ólína.

Vill forseta sem er ekki hluti af stjórnmála- og embættismannakerfinu 

Í þætt­inum sagði Steinunn Ólína að fólk hefði hvatt sig til að fara fram, meðal ann­ars vegna þess að hún stendur fyrir utan stjórn­málin, emb­ætt­is­manna­kerfið og hafi engra við­skipta­legra hags­muna að gæta.

Hins vegar hafi hún skoð­anir á ýmsum mál­efnum sem hún sé óhrædd við að tjá opin­ber­lega um. Þá seg­ist hún bjóða sig fram fyrir fólkið í land­inu sem upp­lifir valda­leysi gagn­vart stjórn­völdum. 

„Nú er á Íslandi, það má bara segja að ráð­herr­arnir haga sér eins og ríki í rík­inu. Á þing­inu fara fram leik­sýn­ingar sem eng­inn skilur um hvað ræðir og svo eru teknar ákvarð­anir af ráð­herrum og full­trúar þjóð­ar­innar í ýmsum flokkum, það er bara gert grín að þeim í stjórn­ar­and­stöð­unni þegar þau reyna vinna fyrir sína umbjóð­endur og koma þeirra áhyggju­efnum á fram­færi.“

Segir kosningarnar í ár vera mjög pólitískar

Steinunn Ólína telur hún að fram­bjóð­endur ættu ekki að fara í graf­götur með það að for­seta­kosn­ing­arnar í ár eru póli­tískar.

„Það eru mjög stór mál undir og það skiptir veru­legu máli að íslenska þjóðin, og þá er ég ekki að tala um sjálfa mig, íslenska þjóðin veljir sér for­seta sem getur staðið sjálf­stæður og lætur ekki grauta í sér af emb­ætt­is­manna­kerf­inu eða stjórn­mál­unum og getur staðið fast með hags­munum þjóð­ar­innar. Og, hags­munir þjóð­ar­innar eru mínir hags­munir.“   

Sjá má þátt­inn í heild sinni í spil­ar­anum hér: