Mæld tólf mánaða verðbólga lækkar á milli mánaða, úr 9,9 prósentum niður í 9,5 prósent, samkvæmt nýjum tölum Hagstofunnar um vísitölu neysluverðs í maí.

Vísitalan er þó að hækka, eða um 0,39 prósent frá fyrri mánuði. Vísitala neysluverðs án húsnæðis hækkar um 0,14 prósent frá því í apríl.

Í tilkynningu frá Hagstofunni kemur fram að verð á mat- og drykkjarvörum hafi hækkað um 0,8 prósent á milli mánaða og að kostnaður vegna búsetu í eigin húsnæði hafi hækkað um 1,3 prósent. Hefur húsnæðisliðurinn mest áhrif á hækkun vísitölunnar á milli mánaða.

Á móti þessum hækkunum vegur hins vegar lækkun flugfargjalda, en þau lækkuðu um 7 prósent frá mælingu Hagstofunnar í apríl.

Á undanförnum tólf mánuðum mælist verðbólga, ef ekki er horft til húsnæðisliðarins, 8,4 prósent.

Peningastefnunefnd Seðlabankans tilkynnti á miðvikudag um stýrivaxtahækkun, þá þrettándu í röð, til að reyna að koma böndum á verðbólgu. Vextir bankans hækkuðu um 1,25 prósentustig og eru nú 8,75 prósent.