Á annan veg – hátíðarsýning með nýrri tónlist
Árið 2011 kom út kvikmyndin Á annan veg eftir Hafstein Gunnar Sigurðsson. Myndin gekk með eindæmum illa í íslenskum kvikmyndahúsum á sínum tíma, en mjög vel á erlendum kvikmyndahátíðum, og svo fór að hún var að endingu endurgerð í Bandaríkjunum með þeim Paul Rudd og Emile Hirsch í aðalhlutverkum, nú undir heitinu Prince Avalanche.
En þótt fáir hafi séð hana hér heima þá eignaðist myndin samt heita aðdáendur. „Ég segi það og skrifa: Besta bíómynd sem gerð hefur verið á Íslandi. Frábært handrit & leikstjórn – og „Fá utanumann“ er setning aldarinnar. Æðisleg myndataka og gjörsamlega sturlaður leikur Steina, Svenna og Himma,“ segir Stephan Stephensen, betur þekktur sem President Bongo.
Það var samt eitthvað sem vantaði. „Á sínum tíma fannst mér vanta kvikmyndatónlist, sennilega af því hún var alls ekki til staðar. Mig langaði líka að prófa að gera tónlist við mynd og gabbaði Hadda til þess að leyfa mér að prófa,“ segir Bongó-forsetinn um hvernig það atvikaðist að hann samdi tónlist við áður nánast tónlistarlausa mynd. Tónlistin hans hafði áður komið út sem auka valmöguleiki á DVD spilaranum en er nú að koma út á vínyl og nú verður í fyrsta skipti hægt að sjá myndina í bíó með tónlist forsetans, á aðeins einni sýningu í Bíó Paradís. Í kjölfar sýningar verður hægt að kaupa vínylplötuna og svo verður vitaskuld partí með plötusnúð og tilheyrandi.
Útgáfutónleikar Tilbury – So Overwhelming
Hljómsveitin Tilbury fagnar útgáfu plötunnar So Overwhelming í Gamla bíói, en þetta er þriðja plata sveitarinnar og sú fyrsta í nærri áratug. Og sú besta að sögn söngvarans, Þormóðs Dagssonar. „Þetta er langbesta platan okkar myndi ég segja. Og það verður mjög spennandi að spila hana í fyrsta skipti á sviði. Við fáum góðan liðsauka á útgáfutónleikunum til að gera hljóðmyndina enn stærri en við höfum áður verið með. Þannig að við erum rosalega spenntir fyrir þessum tónleikum.“
Tilbury hófst sem sólóverkefni Þormóðs söngvara, sem kallaðist Formaður Dagsbrúnar, en þróaðist svo yfir í Tilbury, sem gaf út plöturnar Exorcise 2012 og Northern Comfort tveimur árum síðar. Og fá nú gestasöngvara með á tónleikana. „Svo gefst þarna einnig fágætt tækifæri til að sjá og hlusta á Bony Man á tónleikum, en hann átti eina af bestu plötum síðasta árs,“ bætir Þormóður við, en Bony Man er listamannsnafn Guðlaugs Jóns Árnasonar, sem gaf út plötuna Cinnamon Fields fyrir ári síðan.
Eurovision-tónleikar og partí
Ef þú hefur ekki tíma til að skipuleggja þitt eigið Eurovion-partí eru ófáir staðir búnir að skipuleggja slíkt teiti fyrir þig. Það verður hægt að horfa á úrslitin víða á landinu, í Bíó Paradís, á Gauknum, á Loft Hostel, Kex Hostel og á Tehúsinu á Egilsstöðum, svo aðeins örfáir staðir séu nefndir. Á brugghúsinu Smiðjan í Vík í Mýrdal mætir svo Jónsi með gítarinn og slær upp Eurovision-partíi í kjölfar keppninnar.
En það er líka nóg Júró kvöldið áður, en þá verður Euro Singalong með Guðrúnu Árnýju í Sjálandi í Garðabæ og risastórir Eurovision-tónleikar í Háskólabíói, þar sem söngvarar og Eurovision-stjörnur fortíðar á borð við Siggu Beinteins, Grétar Örvars, Friðrik Dór, Selmu Björns, Eyjólf Kristjáns, Pálma Gunnars, Helgu Möller, Einar Ágúst, Telmu, Jónsa, Matta Matt, Ernu Hrönn og Maríu Ólafs koma fram. Á meðan munu Egilsstaðabúar geta látið reyna á hversu miklir Júrónördar þeir eru á Eurovision pöbbkvissi á Askur Taproom.
Fyrir daufum eyrum – Dagný Kristjánsdóttir
Dagný Kristjánsdóttir mun halda erindi um ungar stúlkur og augnaráð karla, bæði í völdum skrifum Halldórs Laxness og gagnrýnenda í samtíma hans. Dagný er prófessor emeríta í íslenskum nútímabókmenntum við íslensku- og menningardeild Háskóla Íslands. Í nýjasta Tímariti Máls og menningar skrifaði hún grein þar sem sjónum var beint að birtingarmyndum kynferðisofbeldis í nokkrum verka skáldsins.
Opnun Minningabankans
Í Minningabankanum gefst tækifæri til að kynnast áður ósögðum ævisögubrotum borgarbúa. Í vetur óx bókverkasafn notenda um ósögð ævisögubrot í formi myndasagna, en þátttakendur í Minningabankanum mættu með minningar sínar og gerðu tilraunir með texta, myndir og einfalt bókband.
Lóa Hjálmtýsdóttir miðlaði til þátttakenda frásagnartækni sem brúar bil og sameinar eiginleika rit- og myndlistar og myndasöguformsins. Hún vann með rithöfundunum Auði Jónsdóttur, Evu Rún Snorradóttur, Kamillu Einarsdóttur og Natöshu S., sem allar deildu með þátttakendum hvernig þær vinna með minningar, drauma og gleymsku í skáldskap sínum.
Á opnun Minningabankans er öllum velkomið að kynnast verkefninu og ræða og deila með öðrum hvernig hægt sé að setja sitt mark á bókasafnið. Viðburðurinn fer fram mitt á milli ævisögu- og myndasögudeildar á fimmtu hæð í Grófinni.
Edda og Ástarpungarnir
Á uppstigningardag verða Edda og Ástarpungarnir með tónleika í Bátahúsinu, en á prógramminu verða popp- og dægurlög í bland við rokk og blús. Ástarpungarnir eru siglfirsk ballsveit en Edda Björk Jónsdóttir er kórstjóri karlakórs Fjallabyggðar. Aðgangur er ókeypis, en tekið er við frjálsum framlögum.
Fleiri viðburðir
Föstudagur 12. maí
Laugardagur 13. maí
Sunnudagur 14. maí
Mánudagur 15. maí
Þriðjudagur 16. maí
Miðvikudagur 17. maí
Fimmtudagur 18. maí
Á döfinni
Á döfinni: Uppistand, mysingur og örverudans
Hátíð hirðarinnar, Svartfugl og ólátabelgirnir í Ólafi Kram
Athugasemdir